Зуфар Нарзуллаев “Ўзбекистон темир йўллари” АЖ раиси этиб тайинланди. Бу ҳақда “Дарё” манбаси хабар берди.
Зуфар Нарзуллаев 2017 йилдан буён “Ўзшаҳар қурилиш инвест” инжиниринг компанияси директори лавозимида ишлаб келаётган эди. 2017—2022 йилларда республика миқёсида кўп қаватли уй-жойлар қурилишига буюртмачилик қилган компания 56 минг хонадондан иборат 1 228 та уй-жой барпо этган.
Шунингдек, Зуфар Нарзуллаев 2009—2016 йилларда темир йўл тизимида капитал қурилиш дирексиясига раҳбарлик қилган ва “Ангрен—Поп” темир йўли қурилишида фаоллик кўрсатган. 2016—2017 йилларда Жиззах вилояти ҳокимининг биринчи ўринбосари бўлган.
11 июль куни бўлиб ўтган президент раислигидаги видеоселектор йиғилишида “Ўзбекистон темир йўллари” АЖ раиси Ҳусниддин Ҳосилов лавозимидан озод этилганди. Йиғилишда бундан тўрт йил аввал Тошкент—Самарқанд, Тошкент—Андижон пулли йўллари ва “Тахтақорача” довонида пулли туннел қуриш топшириқлари берилгани, бироқ на лойиҳа, на инвестор жалб қилиш бўйича ҳалигача амалий ишлар бошланмагани танқид остига олинган.
Шу билан бирга, мазкур йиғилишда 2019 йилдан буён Автомобиль йўллари қўмитаси раиси лавозимида ишлаб келаётган, бироқ йўл соҳасига 2001 йилдан буён жавобгар бўлган Абдураҳмон Абдувалиевни лавозимидан олганди. Унининг ўрнига Бухоро вилояти ҳокимининг молия, иқтисодиёт ва камбағалликни қисқартириш масалалари бўйича биринчи ўринбосари лавозимида ишлаб келган Жамшид Турсунов тайинланган.
Изоҳ (0)