From Russia with Love хакерлар гуруҳи 11–12 июль кунлари Вилнюсда бўлиб ўтган НАТО саммити иштирокчилари хавфсизлиги қандай таъминлангани ҳақидаги махфий маълумотларни эълон қилди.
Литванинг 15мин нашри хабар беришича, 12 июль куни Россиянинг ҳарбий Telegram каналларидан бирида НАТО давлатлари етакчиларининг қўриқчилари сони, саммит иштирокчиларининг ҳаракатланиш йўллари ва алоқа воситалари, шунингдек, саммит хавфсизлигини таъминлаган снайперлар гуруҳи ҳақидаги маълумотлар пайдо бўлган.
Жами 29 та файл ошкор қилинган. Киберхавфсизлик бўйича мутахассис Лукас Апиниснинг таъкидлашича, НАТО саммити якунлангани сабабли маълумотлар унчалик аҳамиятли эмас.
“Агар бу маълумот аввалроқ пайдо бўлганида, унинг қиймати анча юқори бўлар эди”, — дея қўшимча қилди у.
Литва Давлат хавфсизлик департаменти маълумотларнинг сиздирилишини текширмоқда.
11–12 июль кунлари Вилнюсда НАТО саммити бўлиб ўтди. Унинг асосий мавзуларидан бири Украинани қўллаб-қувватлаш эди. Саммитнинг биринчи кунида НАТО давлатлари Украинанинг альянсга кириш жараёнини соддалаштиришга келишиб олди, аммо “барча иттифоқчилар рози бўлиб, шартлар бажарилгандагина” (қандай шартлар экани ноаниқ) Украина альянсга таклиф қилинишини қайд этди.
Изоҳ (0)