Соғлиқ учун ниҳоятда муҳим: 45 ёшдан кейин тўхтатиш шарт бўлган баъзи одатлар

20 ёшда сиз ҳамма нарсанинг уддасидан чиқишингиз мумкин, масалан, кутилмаган зиёфат, уйқусиз тун, эрталаб имтиҳон ва куннинг қолган қисмида ҳовли томорқасида ишлаш. Аммо, афсуски, 45 ёшдан кейин бутунлай бошқача ҳаёт тарзи бошланади. Бир нечта шифокорлар ҳаётингизнинг иккинчи ярмида ўзингизни яхши ҳис қилишингиз учун нималар қилмаслик кераклигини санаб ўтди.

Саратон текширувларини ўтказиб юборманг

Тиббиёт фанлари доктори, оилавий шифокор Александра Альбанесенинг сўзларига кўра, 50 ёшдан кейин саратон касаллигини аниқлаш учун барча тавсия этилган текширувлардан ўтиш ниҳоятда муҳимдир. Аввало, йўғон ичак саратони учун скринингни кечиктиришни тўхтатиш маслаҳат берилади. Дастлаб колоноскопия қилдирган маъқул. Бундан ташқари, аёллар маммография ҳақида унутмасликлари керак. 40 ёшдан кейин бу текширув камида икки йилда бир марта амалга оширилиши зарур.

Ўзбошимчалик билан даволаниш ярамайди

Тиббиёт фанлари доктори ва бариатрик жарроҳ Кевин Хаффманнинг қайд этишича, бу шифокорлар дуч келадиган энг катта муаммолардан бири. Кўп беморлар соғлиғини қўшимчалар, чекловчи диеталар ёки детокс марафонлари билан яхшилашга қарор қилишади.

“Агар сиз муқобил даволаш усулларига мурожаат қилмоқчи бўлсангиз, мутахассисдан маслаҳат сўранг. Баъзида бу усуллар зарарли бўлиши ёки ҳозирги даволаш режимингизга мос келмаслиги мумкин”, дейди у.

Докторга ёлғон гапирманг

40 ёш — ўзимизга бўлган ишончимиз ортган ёшдир. Бу яхши, лекин сиз ўзингизга ҳаддан ташқари ишониб, мустақил равишда даволашга қодир эканингизга қарор қилманг. Шифокорнинг рецептисиз баъзи дори-дармонлар ва қўшимчаларни қабул қилишни бошламанг. Хаффман ҳеч қачон шифокорга ёлғон гапирмасликни ва хатоларни тан олишни маслаҳат беради. Фақат шу тарзда ўзингизни янада кўпроқ зарарлардан ҳимоя қила оласиз.

Жуда қаттиқ ишламанг

Агар сизга секинлашиш учун сабаб керак бўлса, унда тиббиёт фанлари доктори Майкл Грин 45 ёшдан кейин вазифадан ташқари ишларга ёндашувингизни қайта кўриб чиқишни қатъий тавсия қилади. Шунингдек, у жисмоний машқлар, медитация, нафас олиш машқлари ёки юриш учун қисқа танаффуслар қилишни маслаҳат беради. Буларнинг барчаси стрессни енгишга ёрдам беради.