Самарқанд ва Тошкент вилоятларида газдан ноқонуний фойдаланганлар давлатга 250 миллион сўмдан ортиқ зарар етказди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Унга кўра, Бош прокуратура ҳузуридаги департаментнинг Самарқанд вилоят бошқармаси томонидан ўтказилган терговга қадар текширувда Паст Дарғом туманида фаолият юритувчи “Х.М.” оилавий корхонаси иш бошқарувчиси Д.Х. корхона умумий овқатланиш шохобчасини газ тармоғига ўзбошимчалик билан улаб, 138 миллион сўмлик табиий газдан ноқонуний фойдалангани аниқланган.
Шу каби, департаментнинг Тошкент вилоят бошқармаси томонидан газ таъминоти ходимлари билан ҳамкорликда ўтказилган терговга қадар текширувда Зангиота туманида яшовчи Д.Х. умумий фойдаланишдаги газ тармоғига тижорат мақсадида ўғрилик йўли билан уланиб, 125,7 миллион сўмлик табиий газдан ноқонуний фойдалангани аниқланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)