НАТО бош котиби Йенс Столтенберг Украина альянсга аъзо бўлиш учун бажариши керак бўлган шартларни айтди.
Унинг сўзларига кўра, Украинада коррупцияга қарши кураш, давлат бошқаруви институтларини, жумладан, хавфсизлик ва мудофаа секторини модернизация қилиш, шунингдек, НАТО стандартларига мослик бўйича ислоҳотлар олиб борилиши керак.
Бундан ташқари, у уруш давом этаётган бир пайтда альянсга қўшилиш ҳақида гап бўлиши мумкин эмаслигини таъкидлади.
Ўз навбатида, Столтенберг Украина учун НАТОга қўшилиш жараёни соддалаштирилишини айтди. Саммитда Украинани НАТОга аъзо бўлишга яқинлаштириш учун уч элементдан иборат пакетга келишиб олинган.
“Бу армияни НАТО стандартларига ўтказишда ёрдам бериш, Украина альянс аъзолари билан тенг ҳуқуқли овозга эга бўладиган Украина-НАТО форматини яратиш, шунингдек, НАТОга қўшилишнинг стандарт режасини бекор қилишни ўз ичига олади”, — деди альянс бош котиби.
Шунингдек, у НАТО Россия билан зиддиятга интилмаслиги ва унга таҳдид солмаслиги, лекин Россияни ўзининг ҳамкори деб ҳисоблай олмаслигини таъкидлади.
“НАТО хавфларни камайтириш ва кескинлашувнинг олдини олиш учун Москва билан алоқа каналларини очиқ тутмоқчи”, — дейилади баёнотда.
Изоҳ (0)