Ўзбекистонда кредит-модул тизими ОТМ томонидан қўшимча пул ишлаб топиш учун жорий этилгани айтилди

Ижтимоий тармоқларда кредит-модул тизими олий таълим муассасалари томонидан қўшимча маблағ ишлаб топиш учун жорий этилгани ҳақида турли хабарлар тарқалди. Олий таълим, фан ва инновациялар вазирлиги мазкур хабарларга муносабат билдирди. 

Унга кўра, низомга мувофиқ академик қарздор (шу жумладан, ўқишни кўчиришда фанлар фарқига эга бўлганда) талабалар таътил вақтида ёки кейинги семестрлар мобайнида тегишли фанлардан ўзлаштирилмаган кредитлар миқдорига мос равишда базавий тўлов-контракт миқдоридан келиб чиққан ҳолда тўловни амалга оширгандан сўнг ўзлаштирилмаган фанларни ўз ҳисобидан қайта ўқиш ҳуқуқига эга бўлади. Талабани қайта ўқитиш (синов ёки фанлар фарқи учун тўлов эмас) назарда тутилмоқда. Яъни талабага кредит тўплаш учун қайта имконият берилмоқда. Бунда профессор-ўқитувчи ушбу талабаларга белгиланган муддатларда тегишли ўқув машғулотларини олиб боради. Албатта, мазкур жараён муайян харажатларни талаб этади. 

Таълим дастурларини ўлчаш ва таққослашнинг синов бирликлари тизими Европа, Америка ҳамда Осиёнинг турли ва аксарият етакчи университетларида бир неча ўн йилликлар мобайнида қўлланмоқда. Кредит тизими ўқув дастурларини шаффоф ва энг асосийси, таққосланувчан қилади, бу эса талабаларнинг академик мобиллигини оширишга имконият яратади.

“Мамлакатимиз олий таълим тизимини такомиллаштириш таълим олувчилар ва ўқитувчиларнинг ўз фаолиятига муносабатини ўзгартириш зарурлигини тақазо этади. Бу ҳолат кредит-модул таълим тизими бўйича таълим жараёнини ташкил қилишга тўла мос келади.

Кредит-модул тизимига ўтиш Ўзбекистон Республикаси таълим соҳасининг даражалари, босқичлари, академик даражаларини аниқ баҳолашга имкон беради ва уларни шаффоф, ташхисланадиган ва тан олинадиган ҳолатга келтиради. Бу эса жаҳон таълим муҳитига қўшилишнинг бош шартларидан бири ҳисобланади.

Ушбу тизимнинг жорий қилиниши тайёрланаётган кадрларимизни юқори малакали ва жаҳон миқёсида рақобатбардош бўлишини таъминлайди”, — дейилади муносабатда.