“Азовстал” ҳимоячиларининг беш командири Туркияда бўлиб қайтган Украина президенти Владимир Зеленскийнинг самолётида Львовга келди, деб ёзмоқда Euronews.
Украина офицерлари Туркияда қарийб 10 ойдан буён ушлаб турилган эди. Зеленский офиси уларни қайтаришга музокаралар натижасида эришилганини таъкидлади, аммо Киев ҳам, Анқара ҳам тафсилотларни ошкор қилмади.
“Улар Украина учун жанг қилди, мутлақ қаҳрамонларча жанг қилди. Улар Россия асирлигидан ўтди. Сўнг Туркияда 300 кундан ортиқ қолди. Улар учун ватанга қайтиш вақти келди”, — деди Зеленский.
Эслатиб ўтамиз, “Азовстал”ни ҳимоя қилган “Азов” жангчиларининг беш командири 2022 йил май ойида Мариупол бой берилганидан кейин Россияга таслим бўлганди. Сентябрь ойида йирик асирлар алмашинуви пайтида улар Ражаб Тоййиб Эрдўғоннинг шахсий кафолати остида Туркияга юборилди. “Азовчи”лар уруш тугагунга қадар Туркияда қолиши ҳақида келишилди.
Эндиликда Кремль Киев ва Анқарани келишувни бузганликда айбламоқда.
7 июль куни Владимир Зеленский Туркияга ташриф буюриб, Эрдўғон билан учрашди. Улар ғалла келишуви, Киевнинг НАТОга аъзолиги, маҳбуслар алмашинуви, икки томонлама ҳамкорлик ва Украинани қайта тиклаш масалаларини муҳокама қилди. Бу Зеленскийнинг уруш бошланганидан бери Туркияга биринчи ташрифи бўлди.
Эрдўғон Зеленский билан учрашувдан кейинги матбуот анжуманида Украина НАТОга аъзо бўлишга лойиқ эканини айтди.
Изоҳ (0)