НАТО Франция сабаб Токиодаги ваколатхонаси очилишини кейинга қолдирмоқчи — ОАВ

НАТО Токиода ўз ваколатхонасини очиш ҳақидаги қарорни кузга ёки ундан кейинга қолдирмоқчи, деб хабар берди Nikkei Asia ўз манбаларига таяниб.

Нашрнинг ёзишича, альянс учун Осиёда биринчи бўладиган НАТО ваколатхонасини Япония пойтахтида очиш масаласи Вилнюс саммитида келишиб олиниши режалаштирилган эди. Бироқ бу масала бўйича келишувга эришишнинг иложи бўлмади, жумладан, бунга “Хитой билан муносабатларини қадрлайдиган” Франциянинг позицияси сабаб бўлган, деди газета суҳбатдошлари.

Шу билан бирга, НАТО ва Япония муҳокамани давом эттириб, йил охиригача бир қарорга келишга интилмоқда, деб ёзади Nikkei.

Парижнинг Токиода НАТО ваколатхонаси очилишига эътирозлари ҳақида аввалроқ NHK ва Politico нашрлари ҳам хабар қилганди. NHK қайд этишича, Япония ҳарбий блокнинг бир қисми бўлмаса-да, альянсга потенсиал аъзолик 11–12 июль кунлари Вилнюсда бўлиб ўтадиган НАТО саммитида муҳокама қилинади. Унда Япония бош вазири Фумио Кисида иштирок этади.

Эслатиб ўтамиз, НАТО бош котиби Йенс Столтенберг Вилнюсда бўлиб ўтадиган анжуманда Украинани НАТОга яқинлаштирадиган кўп йиллик ёрдам пакети тасдиқланишини айтиб ўтганди.

Польша президенти Анжей Дуда эса саммитда Украина соддалаштирилган тартиб асосида НАТОга қабул қилинишига умид билдирди.