Сирдарё вилояти Янгиер шаҳрида 21 ёшли йигит чўкиб кетаётган она ва болани қутқариб қолганди. Сирдарё вилояти ҳокими ва вилоят Фавқулодда вазиятлар бошқармаси бошлиғи уни эсдалик совғалари билан тақдирлади.
Воқеа 6 июль куни содир бўлганди. Саидисломбек Абдулқосимзода шаҳарнинг қоқ марказидан оқиб ўтувчи Жанубий Мирзачўл каналида она ва бола чўкаётганини кўриб қолиб, уларни қутқармоқчи бўлган ва бунинг уддасидан чиққан. Йигитнинг ўзи ҳам чўкиб кетишига оз қолганини айтган.
ФВВ матбуот хизматининг маълум қилишича, Сирдарё вилояти ҳокими ва вилоят Фавқулодда вазиятлар бошқармаси бошлиғи Ғулом Муҳамедов она ва боланинг ҳолидан хабар олиб, Саидисломбек ва унинг отаси билан учрашди. Учрашув давомида Саидисломбекка вилоят Фавқулодда вазиятлар бошқармаси бошлиғининг фахрий ёрлиғи топширилиб, эсдалик совғалари билан тақдирланди. Шаҳар ҳокимлиги ҳам йигитнинг келажакдаги ишларига зафарлар тилаб, эсдалик совғалари билан мукофотлаганди.
Бундан ташқари, Саидисломбек вилоят ҳокими томонидан Фавқулодда вазиятлар вазирлиги тизимида ишлашга тавсия қилинди.
Изоҳ (0)