Россиянинг Львовга ракета зарбаси қурбонлари сони 10 кишига етди

Львов мэри Андрей Садовийнинг айтишича, шаҳарга қилинган Россиянинг ракеталарининг ҳужуми оқибатида ҳалок бўлганлар сони 10 кишига етди.

Ракета урилган турар жой биноси ўрнида вайроналарни тозалаётган қутқарувчилар яна бир аёлнинг жасадини топган.

“Шу билан қидирув-қутқарув операцияси якунланди”, — деб ёзди Садовий.

6 июлга ўтар кечаси рус қўшинлари Львовга ракета ҳужуми уюштирди. Шаҳар мэри Андрей Садовий воқеани Россия босқини бошидан бери “Львов фуқаролик инфратузилмасига қилинган энг йирик ҳужумлардан бири” деб атади. Садовийнинг сўзларига кўра, ракета бўлаклари Стриска кўчасидаги турар жой биносини вайрон қилган ва яна 35 та бинога зарар етказган.

Львов ҳарбий маъмурияти раҳбари Максим Козицкий эса ракета турар жой биносига тўғридан тўғри урилганини айтди.

Россия томонидан учирилган ўнта ракетанинг еттитаси уриб туширилган. Хусусан, Львов вилоятидаги қишлоқлардан бирида Халқ уйи биноси яқинида ракета парчаси қулаган ва воронка ҳосил бўлган.

Украина президент офиси раҳбари Андрей Ермакнинг айтишича, Россия Ғарб компонентларидан фойдаланган ҳолда ракеталар ишлаб чиқаришда давом этмоқда ва санкцияларни четлаб ўтяпти