Россия ҳарбийлари 6 июлга ўтар кечаси Лвовга “Калибр” қанотли ракеталари билан ҳужум қилиб, турар-жой биносига зарба берди. Бу ҳақда New Voice Украина хабар берди.
.jpg)
Ҳужум оқибатида камида тўрт киши ҳалок бўлган ва 34 киши, жумладан, бир бола яраланган. Ўнлаб уйлар вайрон бўлган, қутқарувчилар вайроналар орасидан омон қолганларни қидирмоқда. Мер Андрей Садовий зарбани шаҳар фуқаролик инфратузилмасига қилинган энг йирик ҳужумлардан бири деб атади.
Лвов вилояти давлат маъмурияти раҳбари Максим Козицкийнинг айтишича, 30 га яқин уй ва 50 дан ортиқ автомобиль зарар кўрган. Мактаблар, Лвов политехника ётоқхоналари, офис мажмуалари вайрон қилинган.
Россия томонидан учирилган ўнта ракетанинг еттитаси уриб туширилган. Хусусан, Лвов вилоятидаги қишлоқлардан бирида Халқ уйи биноси яқинида ракета парчаси қулаган ва воронка ҳосил бўлган.
Шунингдек, Россия ракеталари қолдиқлари қулаши сабабли Золочив туманидаги қишлоқлардан биридаги шахсий хонадонда вайронагарчилик кузатилган.
Украина президент девони раҳбари Андрей Ермакнинг айтишича, Россия Ғарб компонентларидан фойдаланган ҳолда ракеталар ишлаб чиқаришда давом этмоқда ва санкцияларни четлаб ўтади.
“Буни тўхтатишнинг ягона йўли — куч билан. Бизга ҳозиргидан кўра кўпроқ ҳаво ҳужумидан мудофаа тизими, ракетага қарши мудофаа керак. Албатта, хавфсизлик кафолатлари ва Украинанинг НАТОнинг бир қисми бўлиши Путин қўрқадиган ҳақиқий сигналдир”, — деди у.
Изоҳ (0)