Украина президенти Владимир Зеленский Софияга ташриф буюрди. Бортида Украина президенти бўлган Болгария ҳукумати самолёти Кишинёвдан учиб келди, деб хабар берди BTV телеканали.
Зеленский Болгарияга республика ҳукуматининг таклифига биноан келди. Украина президентининг ўзи Telegram'да аниқлик киритишича, ташриф чоғида у болгариялик ҳамкасби Румен Радев ва мамлакат Вазирлар маҳкамаси раҳбари Николай Денков билан учрашиши режалаштирилган.
Шунингдек, Зеленский Болгария ташқи ишлар вазири Мария Габриэль, шунингдек, республика Миллий ассамблеяси спикери Росен Желязков билан ҳам учрашади.
Муҳокама қилиниши режалаштирилган мавзулар орасида Украинанинг НАТОга кириши истиқболлари, Шимолий Атлантика альянсининг бўлажак саммити, шунингдек, хавфсизлик кафолатлари ва Владимир Зеленский таклиф қилган “тинчлик формуласи” бор. Зеленскийнинг режаси, хусусан, Россия қўшинларини олиб чиқиб кетиш, Украина ҳудудий яхлитлигини тиклаш, ядровий хавфсизлик ва барча асирларни озод этишни назарда тутади. Москва таклиф қилинган бу режани рад этган.
Бундан ташқари, Зеленский Болгария раҳбарияти билан Украинага Болгария ёрдами ҳажмини ошириш ва қурилиши тугалланмаган Болгария Белене атом электр станциясидаги Россия ускуналарини сотиш ҳақида гаплашмоқчи. Томонлар, шунингдек, Украинанинг Евроатлантика йўлини қўллаб-қувватловчи декларация ва энергетика соҳасида ўзаро англашув меморандумини имзолашни режалаштирмоқда.
Изоҳ (0)