“Вагнер” асосчиси Евгений Пригожин Санкт-Петербургда, деди Александр Лукашенко 6 июль куни журналистларга. Россия расмийларига ишонилса, “Вагнер” исёнидан кейин Пригожин Беларусга кетган бўлиши керак эди.
“У Беларусь ҳудудида эмас”, — деб Лукашенконинг сўзларидан иқтибос келтирди “Пул Первого” Telegram канали.
Лукашенконинг айтишича, “Вагнер” ёлланма аскарлари, “ўз лагерларида”. У айнан қаерда жойлашган лагерлар ҳақида гап кетаётганини очиқламади. Аввалроқ Беларуснинг Могилев вилоятида “Вагнер” бўлинмаларини жойлаштириш учун чодирли лагер қурилаётгани хабар қилинганди.
Евгений Пригожин 23 июнь куни кечқурун исён кўтарди. “Вагнер” ёлланма аскарлари қаршиликсиз Ростов-Донга кириб келди. Пригожин аскарлар “адолат марши” билан Москвагача боришини айтди. Исёнчилар Россия пойтахти томонга бир неча юз километр юрди, аммо 24 июнь куни кечқурун Пригожин ортга қайтишни эълон қилди.
Бу қарор Пригожин ва Лукашенко ўртасидаги музокаралардан сўнг қабул қилинган, унда Пригожиндан “Беларусга кетиш” сўралган. Россия ҳукумати ёлланма аскарларга бир нечта вариантни таклиф қилди: “Беларусга кетиш”, Россия Мудофаа вазирлиги ёки бошқа ҳуқуқни муҳофаза қилиш органлари билан шартнома тузиш, ҳарбий хизматни тарк этиб, оиласига қайтиш.
Изоҳ (0)