Ўзбекистон 2023 йилда ўрикнинг рекорд ҳосилини йиғиб олиши мумкин. Бу ҳақда EastFruit таҳлилий платформаси хабар берди.
Қайд этилишича, бу ўз навбатида, ўрик экспорти ҳажмининг ўсишига ва Ўзбекистоннинг ушбу кўрсаткич бўйича жаҳон етакчилари сафига қайтишига ёрдам беради.
Ҳозирги кунда мамлакатда ўрик нархи тарихан паст даражада. Бундан паст кўрсаткич коронавирус пандемияси туфайли экспорт вақтинча тўхтатилган 2020 йилда қайд этилган. Мутахассисларнинг фикрига кўра, мавсумнинг дастлабки икки ойида Ўзбекистон ўрик экспорти бўйича рекордни такрорлашга муваффақ бўлди ва 40 минг тоннага яқин маҳсулотни ташқи бозорларга сотди. Бу ўтган йилнинг шу даврига нисбатан 5,4 бараварга кўпдир.
Шунингдек, Ўзбекистон мавсум давомида камида 65-70 минг тонна ўрикни ташқи бозорларга сотиши мумкинлиги тахмин қилинмоқда. Маълум шароитларда экспорт ҳажми ҳатто 75 минг тоннадан ошиши ҳам мумкин.
Таъкидланишича, Испаниянинг ўрик экспорти ҳажми 2023 йилда 60 минг тоннадан ошмайди. Италиянинг имкониятлари эса қарийб 45 минг тоннани ташкил қилиши мумкин. Туркиянинг янги пишган ўрик экспорти биринчи марта 100 минг тоннадан ортиши мумкин. Бу давлат Марказий Осиё мамлакатлари, хусусан, Ўзбекистондан ҳам кўп миқдорда арзон қуритилган ўрикларни харид қилиш имкониятига эга бўлади. Шу боис маҳсулот экспортининг муҳим қисмини янги пишган ўрик ташкил этади.
Ўзбекистон мавсум якуни бўйича жаҳон бозорида янги ўрик экспорти рейтингида иккинчи ўринни эгаллаши, авваламбор, 2023 йилда Италия ва Испанияда ўрик ҳосили кутилганидан анча камлиги ва сўнгги йиллардаги ўртача кўрсаткичдан паст экани билан боғлиқ.
“Ўзбекистон айни пайтда Италияга нисбатан кўпроқ ўрик экспорт қилди. Гарчи Италияда янги ўрик мавсуми Ўзбекистонга қараганда узоқроқ давом этса-да”, — дейилади хабарда.
Ўзбекистоннинг ўрик экспортидаги ўрни
2017 йили Ўзбекистон энг юқори 6 та ўриндан бирини банд қилган. Шу йили Ўзбекистон ўрик экспорти ҳажмини 50 минг тоннадан тахминан 23 минг тоннага камайтирган. Ўзбекистондан олдинги ўринларни Испания, Туркия, Франция, Италия ва Греция эгаллаган. 2016 йили Ўзбекистон ўрик экспорт қилиш бўйича Испаниядан кейин 2-ўринни эгаллаб турган.
2018 йилда Ўзбекистон сархил ўрик экспорти бўйича дунёдаги етакчи уч мамлакат қаторидан ўрин олган эди. 2021 йилда бўлса, ички бозорда ўрик юқори нархда экани ва қўшни Тожикистонда нисбатан арзонлиги сабабли, қўшни мамлакатдан ушбу мева импорт қилинган. Шундай қилиб, ўрик экспорти бўйича жаҳон миқёсидаги етакчилардан бири ҳисобланган Ўзбекистон айни дамда унинг импортчисига айланган.
Изоҳ (0)