Осиё инфратузилмавий инвестициялар банки (ОИИБ) Ўзбекистон билан ҳамкорликни кенгайтириш ниятида. Бу ҳақда 4 июль куни Инвестициялар, саноат ва савдо вазири Лазиз Қудратов ва ОИИБ вице-президенти Людгер Шукнехт билан учрашувда айтиб ўтилди.
Учрашувда Ўзбекистон ва ОИИБ ўртасидаги молиявий-техник ҳамкорликни кенгайтириш, мавжуд лойиҳаларни амалга ошириш бўйича бажарилган ишларнинг бугунги ҳолати муҳокама қилинди. Хусусан, энергетика, инфратузилмавий ривожланиш, транспорт ва тиббиёт каби йўналишларда умумий қиймати 2,4 миллиард доллардан ортиқ бўлган 13 та лойиҳани ўз ичига олган ОИИБнинг Ўзбекистондаги жорий инвестиция портфели ҳажми ўсишининг ижобий динамикаси эътироф этилди.
“2023 йил март ойидан буён Банк томонидан энергетика соҳасида лойиҳаларни амалга ошириш доирасида давлат кафолатисиз 415 миллион доллари миқдоридаги 3 та кредит линияси маъқулланди”, — дейилади хабарда.
“Ўзбекистон биз билан лойиҳаларнинг уч йиллик цикли бўйича ҳамкорлик қилаётган биринчи давлатдир. Бизнинг асосий эътиборимиз, албатта, инфратузилмани барпо этиш, инсон капиталини мустаҳкамлаш, хусусий секторни ривожлантириш, шунингдек, иқлим ўзгаришининг салбий оқибатларини олдини олиш бўйича глобал масалаларни илгари суришга қаратилган. Мамлакатингиз билан самарали ҳамкорлигимизни янада кенгайтиришдан манфаатдормиз, — деган Людгер Шукнехт.
Маълумот учун
- Осиё инфратузилмавий инвестициялар банки кўп томонлама ривожланиш институти ҳисобланади.
- Унинг мақсади Осиё-Тинч океани минтақасида молиявий ҳамкорликни рағбатлантириш, Осиёда йўллар ва аэропортлар қуришдан тортиб, алоқа антенналари ва арзон уй-жойлар қиришгача бўлган инфратузилмавий лойиҳаларни молиялаштиришдир.
- Ҳозирги кунда 80 дан ортиқ давлат ОИИБга аъзодир.
Изоҳ (0)