“Вагнер” хусусий ҳарбий компанияси раҳбари Евгений Пригожин Беларусга кетганидан кейинги биринчи мурожаатини эълон қилди. Мурожаат Grey Zone тарғибот-ташвиқот каналида эълон қилинди.
Пригожин ўз мурожаатида исён билан боғлиқ бўлган ва уни деярли Москвага олиб борган “адолат маршиъни эслади.
“Бугун биз ҳар қачонгидан ҳам кўпроқ сизнинг қўллаб-қувватлашингизга муҳтожмиз. Бунинг учун раҳмат. Бизнинг ‘адолат маршимиз’ сотқинларга қарши курашиш ва жамиятимизни сафарбар қилишга қаратилганини тушунишингизни истайман. Ўйлайманки, биз бу борада катта муваффақиятларга эришдик”, — деди у.
Ўз мурожаатида Пригожин жангчиларининг бўлажак “фронтдаги навбатдаги ғалабалари” ҳақида ҳам гапирди, аммо келажакдаги режалари ва “Вагнер” хусусий ҳарбий кампанияси жойлашган жойни ошкор қилмади.
ОАВ маълумотларига кўра, АҚШ разведкаси “Вагнер” раҳбари Евгений Пригожиннинг Россияда исён уюштириш режалари ҳақида билган, аммо разведка маълумотларини иттифоқчиларидан яширган.
Пригожиннинг исёни пайтида АҚШ Москва билан музокаралар олиб бораётгани маълум бўлган. Хусусан, халқаро стандартлар талаб қилганидек, музокара АҚШдан келган дипломатларнинг ҳаётини сақлаб қолиш ҳақида бўлган.
Пригожин исёни
“Вагнер” билан боғлиқ воқеалар Пригожин Россия Мудофаа вазирлигини вагнерчилар лагерига зарба беришда айблаб, жавоб беришга ваъда берганидан кейин бошланди. 24 июнь куни эрталаб “Вагнер” кучлари Ростов-Дондаги Жанубий ҳарбий округи штаб-квартирасини тўсиб, Москва томон йўл олди. Россия Мудофаа вазирлиги айбловларни рад этиб, буни провокация деб атади.
Ўша куни кечқурун, Лукашенко билан музокаралар натижасида Пригожин чекинишни эълон қилди. Кремль Пригожинга қарши қуролли исён бўйича жиноий иш тўхтатилиши, вагнерчилар жиноий жавобгарликка тортилмаслиги ва Пригожиннинг ўзи Беларусга кетиши мумкинлигини билдирди.
Изоҳ (0)