Туркиянинг Хатай вилояти аҳолисига Ўзбекистон фуқаролари, жумладан, Туркиядаги меҳнат муҳожирларининг маблағлари ҳисобидан сотиб олинган ва жиҳозланган 57 та контейнер уйлар топширилди, деб хабар беради “Дунё” агентлиги.
Маълум қилинишича, тадбир давомида ўзбекистонлик дипломатлар 2023 йилнинг 6 февраль куни содир бўлган зилзиладан жабр кўрган турк халқига яна бир бор чуқур ҳамдардлик билдирган. Ўзбек халқи фожиа содир бўлган биринчи кунданоқ турк биродарларига ёрдам кўрсатгани, бу контейнерларнинг Қурбон байрами арафасида топширилиши уй-жой масаласини ҳал этишнинг энг яхши ечими эканлиги таъкидланган.
Президентимиз Шавкат Мирзиёевнинг Хатай вилоятини тиклаш, жумладан, яқин дўстлик ва ҳамжиҳатликнинг яна бир ёрқин тимсолига айланадиган янги уй-жойлар ва бошқа инфратузилма объектларини барпо этиш борасидаги ташаббусларига алоҳида эътибор қаратилган.
Антакя тумани мери Иззеттин Йилмаз турк халқи Ўзбекистон томонидан фожианинг биринчи соатлариданоқ кўратилган ёрдамни ҳеч қачон унутмаслигини қайд этди. Ўзбекистонлик қутқарувчилар, ҳарбий шифокорлар ўз ҳаётларини хавф остига қўйиб, энг оғир шароитларда меҳнат қилиб, жасорат ва профессионаллик кўрсатиб, жароҳатланганларга ҳар томонлама ёрдам кўрсатгани алоҳида таъкидланди.
Март охирларида Туркиянинг февраль ойидаги зилзилалардан жабрланган Хатай вилояти Овакент қишлоғида Ўзбекистоннинг хайрия ёрдами доирасида 100 та турар жой контейнер ўрнатилиши тўғрисида хабар берилганди. Бундай модулли уйлар Истанбулдаги ўзбек диаспораси томонидан 2016 йилда ташкил этилган Сейҳун таълим ва маданият уюшмасининг бевосита кўмагида ўрнатилади. Уларнинг ҳар бирида битта оила жойлашиши мумкин.
Туркиядаги зилзила оқибатларини бартараф этишда Ўзбекистон томонининг ёрдами
Ўзбекистон ҳукумати томонидан 6 февралдан 13 февралгача Адана вилоятига қидирув-қутқарув, тиббиёт жамоалари ҳамда гуманитар ёрдамни ташувчи 6 та алоҳида карго рейси ташкил этилган.
Туркияга 100 кишидан иборат Ўзбекистон қидирув-қутқарув жамоаси бориб, Ҳатай вилоятида қутқариш ишларини бажарди. 25 февраль куни Ўзбекистонга қайтган ўзбек қидирув-қутқарув жамоаси қутқарув ишлари давомида 18 кишини вайроналар остидан тирик олиб чиқди, 190 кишининг жасадини топишга эришди. 71 кишилик тиббиёт ходимлари эса Ҳатай вилоятида дала госпитали ўрнатиб, 1795 нафар эркак, 1177 аёл ва 888 нафар болага тиббий ёрдам кўрсатди.
Изоҳ (0)