Ўзбекистонда 2022 йил қишида кузатилган аномал совуқ мамлакат қишлоқ хўжалиги учун фойдали бўлган. Бу ҳақда иқлимшунос Эркин Абдулаҳатов “АзонTV” лойиҳасидаги суҳбатда айтиб ўтди.
Эркин Абдулаҳатовнинг таъкидлашича, аномал совуқ қишлоқ хўжалиги маҳсулотлари учун хавф туғдирадиган зараркунанда ҳашаротлар ўлимида муҳим рол ўйнаган.
“Қишнинг илиқ бўлиши ёмон. Эл–Нинё ҳодисаси қишни илиқ қилади. Аномал совуқ кириб келиши камайиб кетади. Совуқнинг ҳам ўзига яраша керакли жиҳатлари бор. Масалан, ҳозир кўпчилигимиз сезмаяпмиз, ўтган йилги аномал совуқ бизга охирги 5-6 йилликдаги мисли кўрилмаган истиқболли қишлоқ хўжалиги маҳсулотларини берди. Сўнги пайтларда помидорларда “ўргимчак кана” деган ҳашарот бўларди. Аввалги йиллар қиш илиқ келаётгани ҳисобига у зараркунандалар ўлмаётганди. Картошкага зарар етказадиган қўнғиз билан ҳам курашардик. Қишда совуқ бўлгани учун ҳозирги кунлар ўша зараркунандаларсиз ўтяпти. Ўриклар ҳам рекорд даражада серҳосил бўлди. Умуман олганда, совуқ ҳарорат қишлоқ хўжалигида жуда яхши эффект берди”, — деди мутахассис.
Эслатиб ўтамиз, Ўзбекистонда 2022 йилнинг январида сўнги 20 йилликдаги энг совуқ ҳаво ҳарорати (–20 даражагача) кузатилган.
Изоҳ (0)