АҚШ қонунчилари Крис Ван Голлен ва Линдси Грем Сенатнинг Қуролли кучлар қўмитасидан Украинага қўшимча ҳаво ҳужумидан мудофаа тизимларини беришга кўмаклашишни сўради. Гап Исроилнинг ракетага қарши “Темир гумбаз” мудофаа тизимлари ҳақида кетмоқда.
“Украина Россия ҳарбийларига қарши мардона курашини давом эттирар экан, биз Украина ҳаво ҳужумидан мудофаа тизимини қўллаб-қувватлаш ва унинг ҳудудий яхлитлигини ҳимоя қилишга ёрдам беришнинг шошилинч зарурати ҳақида ёзамиз”, — дейилади хабарда.
Сенаторларнинг таъкидлашича, Патриот ва HAWK тизимлари, улар учун ўқ-дорилар аллақачон тақдим этилганига қарамай, АҚШ томони кўпроқ тизимларни тақдим этиши мумкин ва керак.
Айни пайтда АҚШ ҳарбийларида иккита “Темир гумбаз” батареяси бор — бири жойлаштиришга тайёр, иккинчиси ҳозирда янги жиҳозланишни якунламоқда, шунинг учун АҚШда Украинага жўнатилиши мумкин бўлган камида битта батарея бор.
Шунингдек, ҳужжатда айтилишича, ҳар бир Темир гумбаз батареяси 150 квадрат километр майдонни ҳимоя қила олади.
“Бугун биз бу батареяларни жойлаштириш орқали кўпроқ украиналикларнинг ҳаётини сақлаб қолишимиз мумкин. Бироқ жиддий хавотирлар туфайли Исроил ҳукумати АҚШ томонидан ушбу батареяларни узатишга тўсқинлик қилди”, — деб ёзади сенаторлар.
“Сиздан ёрдам кўрсатишнинг бошқа усулларини, жумладан, уларни ўз кучларимиз назорати остида АҚШнинг бошқа иттифоқдошига беришни кўриб чиқишингизни сўраймиз”, — дейилади мурожаатда
Изоҳ (0)