ЎзЛиДеПдан президентликка номзод Шавкат Мирзиёев келгуси 7 йилда вилоятда 100 минг квартирали 2 300 та замонавий ва ҳамёнбоп уй-жой қурилишини айтди.
“Жумладан, Самарқанд шаҳри ва барча туманларда “Янги Ўзбекистон” массивлари барпо этилади. 5 300 километр ички йўллар ва 160 та кўприк таъмирланади, 5 700 километр электр тармоқлари, 2 мингта трансформатор янгиланади.
Шунингдек, 7 минг километр ичимлик ва оқова суви тармоқлари қурилади, 180 та маҳаллада ичимлик сув таъминоти яхшиланади. Натижада 2030 йилга бориб, вилоят аҳолисининг тоза ичимлик суви билан таъминланиш даражаси 96 фоизга етказилади. Умуман, ичимлик суви ва йўллар инфратузилмасини яхшилашга 450 миллион доллар йўналтирилади”, – деди номзод.
Учрашувда Шавкат Мирзиёев Самарқанд шаҳрини аҳоли ва сайёҳлар учун қулай бўлган “бир миллионлик шаҳар”га айлантириш борасидаги режалари ҳақида маълум қилди.
Бунинг учун:
- Самарқанд, Пастдарғом, Оқдарё ва Тойлоқ туманлари ҳудудидан 18 минг гектар ер майдони шаҳар таркибига ўтказилади;
- вилоятнинг маъмурий маркази шаҳарнинг тарихий марказидан бошқа ҳудудга кўчирилади;
- Самарқанд шаҳрида сув таъминоти ва йўл тармоқларини модернизасия қилишга қўшимча 270 миллион доллар ажратилади;
- шаҳарда жамоат транспорт тизими тўлиқ модернизасия қилинади.
“Бу мақсадлар учун 40 та янги автобус йўналиши, аэропорт, темир йўл вокзали ва тарихий марказларни боғлайдиган 5 та экспресс автобус йўналиши ташкил қилинади”, – деди номзод.
Изоҳ (0)