Президентликка номзод Шавкат Мирзиёев самарқандлик сайловчилар билан учрашувда келгуси 7 йилда республика аҳамиятидаги йўлларни қуриш ва таъмирлашга жами 5,3 миллиард доллар йўналтирилишини маълум қилди.
“Бугунги кунда, “Тошкент – Самарқанд” йўналишида суткасига 35 мингта, “Тошкент – Андижон” йўлида 30 мингта автомобиль ҳаракат қилмоқда. Бу – йўлларга юклама 1,5-2 баробар кўпайди, дегани.
Шу боис, Европа тикланиш ва тараққиёт банки ҳамда Жаҳон банки кўмагида “Тошкент – Самарқанд” ва “Тошкент – Андижон” йўналишларида хусусий шериклик асосида янги тезюрар автомобиль йўллари қурилади. Бунга 4 миллиард доллар инвестиция киритилади. Натижада ушбу йўналишларда манзилга етиб бориш вақти 2 баробар қисқаради”, — деди номзод.
Шавкат Мирзиёев Осиё инфратузилма инвестициялар банки кўмагида Тошкент – Шаҳрисабз – Термиз йўли қайта қурилиши, “Самарқанд – Бухоро – Олот” йўли таъмирланишини айтди.
“Бунга 300 миллион доллар ажратамиз”, – деди номзод.
Шавкат Мирзиёев ўз сўзида Самарқанд вилоятида келгуси 7 йилда қўшимча 110 мингта янги ўқувчи ўрни яратилишини айтди.
“Бунда 21 та янги мактаб ва 347 та мактаб учун қўшимча бино қурилади, 210 та мактаб капитал таъмирланади. Самарқандда 2030 йилга қадар бирорта маҳаллада боғча муаммоси қолмайди.
Бунинг учун, 76 та маҳаллада илк бор боғча фаолияти йўлга қўйилади, қўшимча 255 та боғча ташкил қилинади”, – деди номзод.
Изоҳ (0)