Қорақалпоғистон Вазирлар Кенгаши ҳузурида юридик шахс ташкил этмаган ҳолда “Маҳаллаларни қўллаб-қувватлаш” жамғармаси ташкил этилади. Бу ҳақда ҳукуматнинг тегишли қарори лойиҳаси ишлаб чиқилди.
Унга кўра, жамғарма президентнинг 2023 йил 30 март куни Қорақалпоғистонга ташрифи якунлари бўйича берилган топшириқлар ижросини таъминлаш, маҳаллаларнинг инфратузилмаларини ривожлантириш, аҳолининг турмуш шароитларини янада яхшилаш, маҳаллаларни ижтимоий-иқтисодий ривожлантириш йўналишидаги дастурлар ижроси ва мавжуд муаммоларнинг ўз вақтида ва тезкор ҳал этилишини таъминлаш учун молиявий ва моддий жиҳатдан қўллаб-қувватлаш мақсадида ташкил этилади.
Жамғарма маблағларидан фойдаланишнинг асосий йўналишлари:
- маҳаллалар ҳудудларидаги ички йўллар, электр энергияси ва табиий газ тармоқлари, ичимлик ва оқова сув тизимларини таъмирлаш ва тиклаш;
- маҳаллалар инфратузилмасини ривожлантириш, ободонлаштириш ва кўкаламзорлаштириш ишларини амалга ошириш;
- маҳаллалардаги “маҳалла кўчабоши ва уйбоши”ларини рағбатлантириш;
- ижтимоий ҳимояга муҳтож ва кам таъминланган оилаларга моддий томондан кўмаклашиш ҳамда уларнинг турар жойларини таъмирлаш;
- фуқаролар йиғинлари бинолари ва улар жойлашган ҳудудларда спорт майдончалари, нуронийлар маскани, ёшлар маркази, болалар майдончалари, кутубхона, маданият марказларини қуриш, йирик ва майда таъмирлаш ҳамда уларни инвентар, мебел, компьютер жиҳозлари ва бошқа ускуналар билан таъминлаш;
- “Яшил макон” умуммиллий лойиҳаси доирасида “маҳалла боғлари”ни ташкил қилиш;
- маҳаллани кичик бизнес ва тадбиркорликни ривожлантириш марказига айлантириш бўйича “Маҳалла стартапи” ва микролойиҳаларни амалга ошириш;
- маҳаллада жиноятчиликнинг олдини олиш ҳамда маҳалла ободлигига ўз ҳиссасини қўшган ташаббускор фуқароларни рағбатлантириш;
- қонунчилик ҳужжатларида тақиқланмаган бошқа мақсадлар учун.
Ташкил этилган жамғармага ҳудудларни ижтимоий-иқтисодий ривожлантириш учун назарда тутилган маблағлар ҳисобидан 2023 йил давомида 452 та маҳалланинг ҳар бирига тўғридан-тўғри 500 миллион сўмдан ажратилади.
Изоҳ (0)