Пенсия жамғармаси ўзини ўзи банд қилган фуқаролар пенсияга чиқа олишлари мумкинлигини эслатди.
“Фуқароларнинг давлат пенсия таъминоти тўғрисида”ги қонунда эркаклар 60 ёшга, аёллар 55 ёшга тўлганда, уларга тўлиқ пенсия тайинланиши белгиланган. Фуқаронинг меҳнат стажи камида 7 йил бўлганда унга тўлиқсиз ёшга доир пенсия тайинланади.
Пенсия жамғармаси хабарига кўра, қонунчиликда ишсиз фуқаролар учун пенсия тайинлаш имконияти ҳам яратилган.
“Тадбиркорлик фаолияти ва ўзини ўзи банд қилишни давлат томонидан тартибга солишни соддалаштириш чора-тадбирлари тўғрисида”ги президент қарорида 78 турдаги меҳнат фаолияти билан шуғулланса ҳамда ўрнатилган тартибда ўзини ўзи банд қилган шахс сифатида рўйхатдан ўтиб, камида базавий ҳисоблашнинг бир баробари (330 минг сўм) миқдорида ижтимоий солиқ тўловини тўласа, 1 йил меҳнат стажига эга бўлади. Демак, ишсиз фуқаро 7 йил давомида ҳар йили Пенсия жамғармасига ижтимоий солиқ тўловини амалга оширса, пенсия олиш ҳуқуқига эга бўлади”, — дея эслатган жамғарма.
Бугунги кунда иш стажи тўлиқ бўлмаган чоғдаги ёшга доир пенсиянинг энг кам миқдори қўшимча тўловни ҳисобга олган ҳолда — ойига 535 000 сўм.
“Пенсия миқдори иш ҳақи ва иш стажига боғлиқ. Агар фуқаро ижтимоий солиқни қанча кўп тўласа, пенсия миқдори ҳам шунча юқори бўлади”, — дея хабар берган Пенсия жамғармаси.
Маълумот учун, айни пайтда Ўзбекистонда пенсия ва нафақа олувчиларнинг умумий сони 4 миллион 447 минг 597 нафарни ташкил қилади. Шундан пенсия олувчилар 3 миллион 839 минг 508 нафар, нафақа олувчилар 608 минг 89 нафардир. 2023 йилнинг 1 июнь ҳолатига кўра, ёшга доир пенсия олувчилар сони 3 миллион 182 минг 617 нафарни, ногиронлик пенсиясини олувчилар 426 минг 532 нафарни, боқувчисини йўқотганлик пенсиясини олувчилар 230 минг 359 нафарни ташкил қилади.
Изоҳ (0)