Қашқадарёда хашак сотиш учун мўлжалланган айвон ва юк машинаси ёниб кетди

Қашқадарё вилояти Қарши туманида хашак сотиш учун мўлжалланган айвон ёниб кетди. Бу ҳақда вилоят ФВБ ахборот хизмати хабар берди.

Унга кўра, 23 июнь куни соат 16:34 ларда Қарши тумани “Тинчлик” МФЙ Янгиобод кўчасида ёнғин содир бўлаётганлиги тўғрисида хабар келиб тушган. Воқеа жойига қутқарув хизматидан жами 3 та ёнғин-қутқарув бўлинмаси ва 1 та сув ташишга мўлжалланган автомобиль (водовоз) жалб этилган. Куч-воситалар ёнғинга соат 16:42 ларда етиб бориб, соат 17:10 ларда тўлиқ ўчирган.

Маълум бўлишича, ёнғин оқибатида фуқаро Х.Ў.нинг яшаш уйи олдида чорва молларига хашак сотиш учун мўлжалланган айвонининг 50 метр квадрат том қисми ва ёнида турган “ГАЗ-53” ва устига ортилган сомон боғламлари (пресс) ёнган. Ёнғин оқибатида тан жароҳат олганлар йўқ. Ҳозирда ёнғин сабаби ва зарарига аниқлик киритилмоқда.