Жиззах ҳокимлиги Prado таъмирига 50 млн, Ўрта Чирчиқ ҳокимлиги Captiva’га 30, Намангандаги ГАИ бошлиғи эса 78 млн: мансабдорлар машинаси таъмирига қанча сарфламоқда?

Мансабдорлар хизматидаги автомобиллар таъмирига қанча маблағ сарфланмоқда? Telegramъдаги “ревизор_узб” канали бу ҳақда маълумот берди.

Қайд этилишича, Жиззах вилояти ҳокими Эргаш Солиев вилоят ҳокимлиги балансидаги Toyota Prado автомобилини таъмирлатиш учун 50 миллион сўм, Cadillac Escalade автомобили учун эса 15 миллион сўм маблағ ажратиш ҳақида фармойиш чиқарган.

Бу ҳақдаги фармойишда ҳоким вилоят Молия бошқармаси бошлиғи А.Раҳматуллаевга топшириқ бериб, ҳар икки автомобиль таъмири учун сарфланиши кўзда тутилган 65 миллион сўм маблағни маҳаллий бюджетнинг захира маблағлари ҳисобидан вилоят ҳокимлигига ажратишини тайинлаган.

Наманган вилояти Ички ишлар бошқармаси, Йўл ҳаракати хавфсизлиги бошқармаси буюртмачилигида таъмирланган Captiva учун ҳам катта маблағ сарфланган. Давлат рақами 50 700 VSF бўлган Captiva русумли хизмат автотранспортини таъмирлаш учун 78,3 миллион сўм пул маблағ ажратилган.

Тошкент вилоятининг Ўрта Чирчиқ тумани ҳокимлиги туман ҳокимининг Captiva русумли хизмат автомобилини таъмирлаш учун 30 миллион сўм маблағ ажратган.

Камбағалликни қисқартириш ва бандлик вазирлигига тегишли давлат рақами 01 777 APC бўлган Traverse русумли хизмат автотранспортининг мой алмаштириши ҳамда бошқа таъмирлаш ишлари учун 17,1 миллион сўм сарфланган.

“Камбағалликни қисқартириш ва бандлик вазирлиги томонидан ушбу хизмат автотранспорти қачон харид қилингани номаълум — очиқ манбаларда маълумот йўқ”, — дейилади Telegram каналидаги бу ҳақдаги хабарда.