Cobalt, Lacetti, Damas автомобиллари энг кўп ишлаб чиқарилмоқда. Бироқ улар сотувда йўқ

UzAuto Motors жорий йилнинг ўтган беш ойи давомида 120 мингтадан ортиқ енгил автомобиллар ишлаб чиқарган. Бу ҳақда Статистика агентлиги хабар берди.

Жорий йилнинг январь—май ойларида энг кўп ишлаб чиқарилган автомобиль Cobalt (39 минг 264 дона) бўлди. Кейинги ўринларда Lacetti (27 минг 961 дона), Damas (26 минг 815 дона), Tracker (8 минг 853 дона), Onix (6 минг 943 дона) ишлаб чиқарилган. Энг кам ишлаб чиқарилган автомобиль —Nexia Т-250 (1 минг 992 дона) бўлди. Шу билан бирга, 8 минг 612 дона махсус енгил автомобиллар ишлаб чиқарилган.

UzAuto Motors 2022 йил 17 декабрда Cobalt, Lacetti, Damas автомобиллари сотувини тўхтатган. Компания 2023 йилдан Spark ва Nexia ўрнига Tracker ва Onix ишлаб чиқаришини маълум қилган. Ҳозирда Tracker ва Onix сотувда мавжуд. Аммо нархи 200 миллион сўмдан юқори бўлган бу автомобиллар учун навбат катта бўлиб, тўлов қилган мижоз машинасини олишни 1—1,5 йил кутишига тўғри келади.

Аввалроқ UzAuto Motors вакили “Дарё” мухбири билан суҳбатда ишлаб чиқарилаётган, аммо сотувда мавжуд бўлмаган мазкур автомобиллар қаерга “кетаётгани” тўғрисида маълумот берганди.

“Ишлаб чиқарилаётган автомобиллар эски тузилган шартномалар бўйича етказиб берилмоқда. Навбатлар камайгач, сотув шартномалари қайта тикланади”, — дея маълум қилган манба.