Қашқадарёда МИБ ходимлари ҳомиладор аёлга куч ишлатгани айтилди. МИБчилар эса ҳолат акси бўлганини билдирмоқда

Қашқадарё вилоятининг Китоб туманида яшовчи Шоира Аҳмедова қорнида ҳомиласи бўлишига қарамасдан МИБ ходимлари унга қўпол муносабатда бўлиб, 350 минг сўмлик қарздорлик учун унга тан жароҳати етказганини, шахсий автомобили қарздорлик сабаб тортиб олинганини айтиб, “Дарё”га мурожаат йўллади.

“20 июнь куни Китоб тумани Мажбурий ижро бюросидан менга телефон қилишиб, 350 минг сўм миқдорида қарздорлигингиз бор дейишди. Шунда мен ҳозир имкониятим йўқ, пайшанба куни тўлаб бераман дедим. Шунда мен билан телефонда гаплашаётган ходим сен муттаҳамсан деди. Унинг бу гапига чидолмай, МИБга бордим. Борсам, ўша ходим уч нафар эркак билан чиқиб келди. Уларнинг қўлида камера ҳам бор эди. Шунда улар менинг телефонимни, автомобилим калитини тортиб олишди. Учта эркак ҳомиладор бўлишимга қарамасдан, уриб, турткилаб, менга куч ишлатди”, — дейди “Дарё”га бу ҳақда шикоят қилган аёл.

Мурожаатчининг айтишича, унинг телефони ва автомобили калити тортиб олиниб, ўзига нисбатан қўпол муносабат қилинганидан сўнг, у МИБ биносидан чиқиб, бошқа бировнинг телефони ёрдамида опасига қўнғироқ қилган.

“Кўчага чиқиб, бировнинг телефонидан опамга телефон қилдим. Опам МИБ биносига келиб, 350 минг сўм миқдоридаги қарзимни ҳам тўлаб берди. МИБ ходимлари эса менинг рухсатимсиз Nexia-3 русумли машинамни ҳайдаб, МИБ биносига олиб кириб қўйди. МИБ ходимлари менга сўкиниб, қўпол муносабатда бўлишди ва хоҳлаган жойингга шикоят қил дейишди”, — дейди мурожаатчи.

Шоира Аҳмедованинг қўшимча қилишича, у ўзига нисбатан қилинган қўпол муносабат ва тан жароҳати олгани учун, Қашқадарё вилоят ИИБнинг 102 қисқа рақамига қўнғироқ қилиб, ҳолат ҳақида хабар берган. Шунингдек, МИБнинг вилоят бошқармаси бошлиғи билан гаплашиб, ходимлари устидан шикоят қилган.

“Ўша куни шифохонага жойлашганимдан сўнг, 102 га қўнғироқ қилиб, ҳолат ҳақида айтиб бердим. Лекин ҳеч ким хабар олмади”, — дейди у.

Аёлнинг қўшимча қилишича, у айни пайтда ҳам шифохонада қолиб, даволанишни давом эттирмоқда.

МИБнинг вилоят бошқармаси ахборот хизмати раҳбари Гулноза Дилмуродова “Дарё”нинг мурожаатчи давоси борасидаги саволларига жавоб берар экан, ҳолат аксинча бўлганини, қарздор МИБ ходимларига тан жароҳати етказганини айтди.

“Жорий йилнинг 20 июнь куни қарздор Ш.Аҳмедова қарздорлигини тўлаш ўрнига Бюронинг Китоб туман бўлими биносига келиб, катта жанжал кўтарган. Гап шундаки, Бюронинг Китоб тумани бўлими иш юритувида қарздор Ш.Аҳмедовадан ‘Variant retail finance’ МЧЖ фойдасига 6 миллион 959 минг 436 сўм, ‘Алиф молия’ МЧЖ фойдасига 7 миллион 777 минг 877 сўм қарзи ҳамда 600 минг сўм миқдорида давлат божини ундириш ҳақида ижро ҳужжатлари бор. Қарздор 2023 йилнинг 20 июнь куни соат тахминан 16:23 лар атрофида бўлим давлат ижрочиси Д.Тўхтаева томонидан Бюронинг туман бўлимига чақиртирилган. МИБ ходими қарздорга бўлим иш юритувидаги мавжуд қарздорликларини берилган ихтиёрий муддатда тўламаганлиги боис, бошқарувида бўлган Nexia-3 русумли автомашинасини қарздорлик эвазига хатлашини айтган. Шу пайт қарздор тўсатдан давлат ижрочисига ташланиб ушбу қарздорликларини тўламаслигини билдириб, оғизга олиб бўлмас сўзлар билан ҳақоратлаб, унинг ўнг қўл ва бўйин соҳасига шилиниш кўринишидаги тан жароҳатларини етказган”, — дейди бошқарма ахборот хизмати раҳбари Гулноза Дилмуродова.

Таъкидланишича, бўлимдаги бошқа давлат ижрочилари қарздорни тинчлантирмоқчи бўлган вақтда қарздор уларни ҳам ҳар-хил оғизга олиб бўлмас сўзлар билан ҳақоратлаб, бўлим биносини тарк этган.

“Мазкур ҳолат бўйича тўпланган материаллар, ҳуқуқий баҳо бериш учун тўпланган ҳужжатлар Китоб туман прокуратурасига юборилган. Натижаси ҳақида қўшимча равишда хабар қилинади”, — дейди масъул.

“Дарё” воқеалар ривожини кузатишда давом этади.