Россия президенти матбуот котиби Дмитрий Песковнинг маълум қилишича, АҚШ президенти Жо Байденнинг Хитой раҳбари Си Цзиньпин ҳақидаги сўзлари Вашингтон сиёсатининг беқарорлигидан далолат беради. АҚШ президенти Хитой раҳбарини “диктатор” деб атаганди.
“Биласизми, бир томондан, бу АҚШ ташқи сиёсатининг жуда қарама-қарши кўринишда эканини англатади. Бошқа томондан, АҚШ ташқи сиёсатида жуда кўп давлатлар учун номақбул бўлган бундай ‘ақл ўргатиш’ ҳолатининг ҳамон давом этаётганини кўрсатмоқда. Бундай давлатлар сони доимий равишда ўсиб бормоқда”, — деди Песков.
Жо Байден Си Цзиньпин ҳақида нима деганди?
АҚШ президенти Жо Байден Калифорниядаги тадбирда нутқ сўзлар экан, Си Цзиньпин АҚШ ҳаво ҳудудида Хитой шарлари топилиб, уриб туширилганидан эсанкираб қолганини, чунки у Пекиннинг бу миссиясидан бехабар бўлганини айтган.
“Си Цзиньпин мен жосуслик аппарати бор ўша ҳаво шарини уриб туширганимдан жуда норози бўлганига сабаб — у шар ҳақида билмаган”, — деди Байден. “Нима бўлаётганини билмаслик эса диктаторларга ёқмайди”.
Хитой бунга қандай жавоб қайтарди?
Хитой Ташқи ишлар вазирлиги АҚШ президенти Жо Байденнинг Си Цзиньпинни диктатор деб атаган баёнотига, табиийки, норозилик билдирди.
“Америка томонининг баёнотлари дипломатик одоб-ахлоқ қоидаларини бузади, бу масъулиятсизлик ва очиқ сиёсий провокациядир”, — дея таъкидлади Хитой ТИВ.
Яқинда Хитойда бўлиб қайтган АҚШ давлат котиби Энтони Блинкен “жосус” шарлар мавзусини ўтмишда қолдиришни таклиф қилди ва Пекинга ташрифини АҚШ—Хитой муносабатларини барқарорлаштиришда муҳим қадам деб атади.
Изоҳ (0)