Токиода “Гарри Поттер”га бағишланган дунёдаги энг катта ёпиқ парк очилди (видео)

16 июнь куни Токиода “Гарри Поттер”га бағишланган дунёдаги энг катта ёпиқ парк очилди, деб хабар бермоқда “Корреспондент.нет” нашри.

Бу жой Токионинг Нерима туманидаги 30 000 квадрат метр майдонда жойлашган. Аввал бу ерда Япония пойтахтидаги энг йирик аттракционлардан бири — Тосимаэн бўлган. У деярли 100 йиллик фаолиятдан кейин 2020 йилнинг август ойида ёпилди.

Чипталар нархи 18 ва ундан катта ёшдагилар учун 45 доллар, 12 ёшдан 17 ёшгача бўлган ёшлар учун 39 доллар, болалар учун эса 29 долларни ташкил қилади.

Туристлар турли манзараларни, жумладан, Хогвартснинг катта зали, Диагон хиёбонини, тақиқланган ўрмон манзарасини ва 9 ¾ платформасини кўриши мумкин.

Шунингдек, паркка ташриф буюрганлар супургига миниб кўриши, сариёғли пивони татиб кўриши, Хогвартс залларида ҳаракатланувчи портретларни томоша қилиши, Хогвартс Экспресс поездига ўтириши, квиддич ўйнаши ва эсдалик совғаларни сотиб олиши ҳам мумкин.

Паркка ташриф буюрувчилар дунёдаги энг катта “Гарри Поттер”га бағишланган дўкондан ташқари, Британия таомлари сотиладиган турли ресторан ва кафеларга бора олади. Масалан, овқатланиш жойларида балиқ, қовурилган картошка ва мол гўшти, инглизча нонушта, тушдан кейин чой ичса бўлади.