16-iyun kuni Tokioda “Garri Potter”ga bag‘ishlangan dunyodagi eng katta yopiq park ochildi, deb xabar bermoqda “Korrespondent.net” nashri.
Bu joy Tokioning Nerima tumanidagi 30 000 kvadrat metr maydonda joylashgan. Avval bu yerda Yaponiya poytaxtidagi eng yirik attraksionlardan biri — Tosimaen bo‘lgan. U deyarli 100 yillik faoliyatdan keyin 2020-yilning avgust oyida yopildi.
Chiptalar narxi 18 va undan katta yoshdagilar uchun 45 dollar, 12 yoshdan 17 yoshgacha bo‘lgan yoshlar uchun 39 dollar, bolalar uchun esa 29 dollarni tashkil qiladi.
Turistlar turli manzaralarni, jumladan, Xogvartsning katta zali, Diagon xiyobonini, taqiqlangan o‘rmon manzarasini va 9 ¾ platformasini ko‘rishi mumkin.
Shuningdek, parkka tashrif buyurganlar supurgiga minib ko‘rishi, sariyog‘li pivoni tatib ko‘rishi, Xogvarts zallarida harakatlanuvchi portretlarni tomosha qilishi, Xogvarts Ekspress poyezdiga o‘tirishi, kviddich o‘ynashi va esdalik sovg‘alarni sotib olishi ham mumkin.
Parkka tashrif buyuruvchilar dunyodagi eng katta “Garri Potter”ga bag‘ishlangan do‘kondan tashqari, Britaniya taomlari sotiladigan turli restoran va kafelarga bora oladi. Masalan, ovqatlanish joylarida baliq, qovurilgan kartoshka va mol go‘shti, inglizcha nonushta, tushdan keyin choy ichsa bo‘ladi.
Izoh (0)