Россиянинг Волгоград шаҳрида ўзбекистонлик 3 нафар меҳнат мигрантининг 160 минг рубль иш ҳақи олиб берилди. Бу ҳақда Ташқи меҳнат миграцияси агентлиги ахборот хизмати хабар берди.
Унга кўра, Волгоград шаҳрида қишлоқ хўжалиги ишларида вақтинча меҳнат фаолиятини олиб борётган 3 нафар ўзбекистонликнинг иш бошқарувчи томонидан паспортлари ва иш ҳақлари олиб қўйилгани ҳамда жисмоний куч ишлатилгани юзасидан қилган мурожаатини тезкорлик билан ўрганиш мақсадида Ташқи меҳнат миграцияси агентлигининг ушбу шаҳардаги вакили воқеа жойига етиб борди.
Ташқи меҳнат миграцияси агентлиги вакили аралашуви билан иш берувчи корхона раҳбари уларнинг паспортларини ва 160 минг рубль иш ҳақларини қайтарди. Иш бошқарувчининг хатти-ҳаракатлари эса ҳуқуқ-тартибот органлари томонидан ўрганилмоқда.
Шу билан бирга, улар вокзалга олиб бориб қўйилди ва Волгоград-Самарқанд поезди учун чипталар олиб беришга кўмаклашилди.
Изоҳ (0)