Самарқанд ва Сирдарё вилоятларида наркотик моддаларнинг ноқонуний айланмасига чек қўйилди, деб хабар бермоқда ЎзА.
Маълум қилинишича, ДХХнинг Самарқанд вилояти бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда Ургут туманида ўтказилган тезкор тадбирда, 1992 йилда туғилган маҳаллий фуқаронинг хонадони холислар иштирокида кўздан кечирилганда, келгусида сотиш мақсадида сақлаб келинаётган 437 грамм героин борлиги аниқланган.
Бошқа ҳолатда эса Ургут туманида яшовчи, 1981 ва 1997 йилларда туғилган икки фуқаро қўлга олиниб, улардан ҳам келгусида сотилиши режалаштирилган 995 грамм опий моддаси тегишли тартибда расмийлаштириб олинган.
Учинчи ҳолатда эса Ургут туманида истиқомат қилувчи, 1987 ва 1997 йилларда туғилган икки фуқаро 581 грамм опийни 6 минг АҚШ долларига сотган вақтларида ашёвий далиллар билан ушланган.
ДХХнинг Сирдарё вилояти бўйича бошқармаси ходимлари томонидан божхона ва ички ишлар органлари билан ҳамкорликда ўтказилган тезкор тадбирда Сурхондарё—Тошкент йўналишида ҳаракатланаётган Cobalt “Сирдарё” ЙПХ масканида тўхтатилиб, кўздан кечирилган.
1992 ва 1996 йилларда Сурхондарё вилоятида туғилган 3 нафар фуқаро кетаётган мазкур автомашина юкхонасида бўлган қопдаги гуруч ичида 1 кило гашиш борлиги аниқланган.
Таъкидланишича, барча ҳолатларда наркотик моддалар Ўзбекистонга Тожикистондан контрабанда йўли билан олиб келинган. Ҳозирда мазкур шахсларга нисбатан Жиноят кодексининг 246 ва 273-моддалари билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)