19-iyun kuni Ukraina davlat budjeti Jahon bankidan 63 million yevro miqdorida mablag‘ oldi, deb xabar bermoqda “UNIAN”.
Ukraina Moliya vazirligi matbuot xizmati xabariga ko‘ra, mablag‘lar Xalqaro taraqqiyot assotsiatsiyasi tomonidan Jahon bankining “Ukrainada barqaror davlat boshqaruvi uchun davlat xarajatlarini qo‘llab-quvvatlash” (PEACE) loyihasi doirasida imtiyozli shartlar bilan taqdim etilgan.
“Mablag‘lar 2023-yilning fevral va mart oylari uchun davlat organlari xodimlari va o‘qituvchilar mehnatiga haq to‘lashni ta’minlash uchun davlat budjeti xarajatlarini qisman qoplashga yo‘naltiriladi”, — deyiladi xabarda.
Qayd etilishicha, kreditni to‘lash muddati 4 yillik imtiyozli davr bilan 10 yil.
Ukraina uchun moliyaviy yordam – tafsilotlar
31-may kuni Ukraina Jahon bankining ko‘p donorlik trast fondi orqali 1,25 milliard dollar grant mablag‘larini olgandi. Pul bolali oilalarga davlat ijtimoiy nafaqalari to‘lash, ta’lim xodimlariga ish haqi, tibbiy kafolat dasturi bo‘yicha tibbiy xizmat ko‘rsatuvchilarga haq to‘lash va hokazolarga yo‘naltirildi.
May oyi boshida Ukraina Jahon bankidan yana ikkita kredit olgan — davlat budjetining ustuvor ijtimoiy xarajatlari uchun 189 million yevro va davlatning oziq-ovqat xavfsizligini qo‘llab-quvvatlash uchun 132 million dollar.
Izoh (0)