Украина мудофаа вазири ўринбосари Анна Маляр Украина Қуролли кучлари Запорожье вилояти жанубидаги Пятихатки қишлоғини озод қилгани ҳақида хабар берди.
Малярнинг Telegram каналидаги постда айтилишича, икки ҳафталик ҳужумлар натижасида 19 июнь куни эрталабги ҳолатга кўра, саккизта аҳоли пункти озод қилинди: Новодаровка, Левадное, Сторожевое, Макаровка, Благодатное, Лобковое, Нескучное ва Пятихатки.
Запорожье вилоятининг аннексия қилинган қисми маъмуриятининг Россия томонидан тайинланган вакили Владимир Рогов ҳам Пятихатки Украина Қуролли кучлари назоратига ўтганини маълум қилганди. Россия Мудофаа вазирлиги эса Украина қўшинларининг Пятихаткига ҳужуми қайтарилганини даъво қилди.
Маляр ўз постида сўнгги икки ҳафта ичида украиналик ҳарбийлар жанубга етти километр илгарилаб, 113 квадрат километр ҳудудни қайтариб олганини қўшимча қилди.
Аввалроқ Владимир Зеленский Украина қўшинлари фронтда Россия армиясининг қаттиқ қаршилигига дуч келаётганини айтганди. Унинг сўзларига кўра, вазият “умуман олганда ижобий, аммо жуда оғир”.
Украина президенти яна бир бор Ғарб иттифоқчиларини ҳарбий ёрдам кўрсатиш, хусусан, самолётлар етказиб бериш ва украиналик учувчиларни тайёрлашни кечиктирмасликка чақирди.
- Украина фронтда қарши ҳужум бошланганини расман эълон қилмаган. Россия Мудофаа вазирлиги Украина Қуролли кучларининг ҳужуми 4 июнь куни бошланганини даъво қилмоқда. 9 июнь куни Россия президенти Владимир Путин ҳужум пайтида Украина Қуролли кучлари фронтнинг бирорта секторида ўз олдига қўйилган вазифаларни бажара олмаганини айтди.
Изоҳ (0)