Украина апрель ойи охиригача ҳар бирида 4 минг аскар бўладиган 12 та жанговар бригадани тайёрлашга интилмоқда. Бу ҳақда The New York Times (NYT) интернетга сиздирилган Пентагон ҳужжатларига таяниб хабар берди. Нашрнинг таъкидлашича, ушбу бригадаларни тайёрлаш саналари Украина қарши ҳужумининг эҳтимолий саналарига мос келади.
Газетанинг ёзишича, мазкур бригадаларга мўлжалланган ҳарбийлар АҚШ ва бошқа НАТО давлатлари мутахассислари томонидан тайёрланмоқда.
Аввалроқ, Newsweek АҚШ Мудофаа вазирлигининг махфий маълумотларига таяниб, қарши ҳужум 30 апрелга белгилангани ҳақида ёзганди. Энди NYT Америка расмийларига таяниб, жанговар ҳаракатларни кучайтириш май ойида режалаштирилганини хабар қилмоқда. Ўтган ҳафта Украина Олий Радасида “Голос” партиясидан депутат Олександра Устинова Киев апрель ойида қарши ҳужумга ўтишни кутгани, бироқ қурол-яроғ етишмагани учун буни номаълум муддатга ортга суришга мажбур бўлганини айтганди.
Россия президенти матбуот котиби Дмитрий Песковнинг айтишича, Москва Украина ҳарбийларининг қарши ҳужуми ҳақидаги барча баёнотларни диққат билан кузатиб бормоқда ва “махсус ҳарбий операция”нинг боришини режалаштиришда бу маълумотларни ҳисобга олмоқда.
АҚШ махфий ҳужжатларининг тарқалиши
Сўнгги ҳафтада интернетда АҚШ разведкаси ва мудофаасига оид бир қатор махфий ҳужжатлар эълон қилинди, уларда жумладан, Украина ва Россия қўшинларининг ҳолати ҳақида баён қилинган. 13 апрель куни АҚШ расмийлари ҳужжатларни сиздиришда гумон қилиб, ҳарбий-ҳаво кучларининг 21 ёшли ходими Жек Тейшейрани ҳибсга олди. Йигитнинг дўстлари у уруш бошланганидан бери махфий ҳужжатларни улашиб келганини айтишди.
12 апрель куни Washington Post газетаси Украина об-ҳаво шароити, ускуналар етказиб беришнинг секинлиги, ўқ-дори тақчиллиги ва махфий ҳужжатлар эълон қилиниши туфайли баҳорга режалаштирилган қарши ҳужумни кейинга қолдиргани ҳақида ёзди. Украина бош вазири Денис Шмигал қарши ҳужум ёзда бошланиши мумкинлигини айтган.
Изоҳ (0)