Ижтимоий тармоқларда она ўз фарзандини йиғлатиб, эрига мурожаат қилгани кўринган видео тарқалди. Айтилишича, аёл Андижон вилоятининг Улуғнор туманида яшайди.
“Раҳматлар айтяпти сизга, кўп раҳмат айтяпти. Йиғла, қаттиқроқ йиғла, менга бу таъсир қилмайди, бу дадангга таъсир қилмаяптими, менга ҳам энди таъсир қилмайди”, — дейди боласини йиғлатиб видеога олаётган она.
Мазкур воқеага тааллуқли экани айтилаётган скриншотларда Ўғилой исмли фуқаро поччасига хабар ёзиб, фарзандини олиб кетмаса ўлиб қолиши мумкинлиги айтилган.
“Почча шу ёшга кирганда фарзанд кўрдингиз, фарзандингиз керак бўлса, уйдагиларингизга айтиб, олиб кетинг. Бола ўлиб қолиши мумкин. Биз ҳеч нарса қилолмаяпмиз. Мен туғганман деб, бизга бермаяпти. Умарбекнинг нима айби бор, юзларига уриб, кўкартириб ташлаган. Ҳа, деса туғдирган келиб, олиб кецин дейди”, — дейилади ёзишмада.
Боласини йиғлатиб, эрига видеомурожаат қилган аёл энди боласига қарамаслигини, бошқа бировга ҳам бермаслигини айтади.
“Йўқолиб, эрга тегиб кет дедингизми? Шу гапингиз ёмон ботди. Мен болангизга қарамасам, ит ҳам қарамайди. Ўзим энди қарамайман, лекин сизларга ҳам бермайман. Томоша қилинг, завқланинг. Қанча қаттиқ гапирганингиз сари, шу бола қийналаверади. Ажаб бўлибди, болангизни қийнаб, завқланяпман”, — дейди она.
“Дарё” мазкур ҳолат бўйича қўшимча маълумот сўраб, Ички ишлар вазирлиги ахборот хизмати раҳбари Шоҳрух Ғиёсов билан боғланди.
“Шуғулланишяпти. Натижаси бўйича тез орада маълумот берилади”, — деди бу ҳақда маълумот берган вазирлик вакили.
Изоҳ (0)