ЎзЛиДеПдан президентликка номзод Шавкат Мирзиёев 15 июнь куни фарғоналик сайловчилар билан учрашувда фермерлар ва кластерлар фаолиятининг ҳуқуқий кафолатлари кучайтирилишини айтди.
Ўз сайловолди дастури юзасидан маъруза қилган Шавкат Мирзиёевнинг сўзларига кўра, кластерлар ва фермерлар ўртасидаги шартнома муносабатлари тўлиқ қайта кўриб чиқилади. Кластерлар томонидан фермерларга кўрсатилган қўшимча хизматлар улар билан ўзаро келишув асосида алоҳида ҳисоб-китоб қилинади.
“Бундан буён, туманда режа бажарилмаяпти, чорва, парранда ёки балиқчиликка озуқа-ем керак, деган важлар билан фермерлар фаолиятига аралашишга қатъиян чек қўйилади”, — деди номзод.
Унинг таъкидлашича, Қишлоқ хўжалиги вазирлиги тизими, ҳокимлар фермер ва кластерлар маҳсулотларига бозор топишга кўмаклашиш билан шуғулланади. Фермерларнинг фаолият турини ўзгартириши соддалашган тартибда бўлади.
Бундан ташқари, қишлоқ хўжалигида кластерлар ва фермерларнинг ерини ҳақиқий бозор активига айлантириш бўйича янги тизим яратилади. Ернинг ижара ҳуқуқини бошқа шахсга ўтказиш, ҳадя қилиш, кредит олишда гаров сифатида фойдаланиш мумкин бўлади.
Изоҳ (0)