Тошкент вилоятида Жанубий Кореяда фаолият юритувчи малакали шифокорлар иш бошлаши мумкин. Вилоят ҳокими Зоир Мирзаев уларни тизимдаги катта лавозимларга ишга таклиф қилди. Бу ҳақда “Дарё”га вилоят ҳокимлиги ахборот хизмати хабар берди.
Маълум бўлишича, Зоир Мирзаев бугун кореялик мутахассислар билан мулоқот қилган.
“Биламизки, Жанубий Корея соғлиқни сақлаш тизими бўйича дунёда етакчи ўринлардан бирини эгаллайди. Хусусан, тиббиёт соҳасида малакали кадрлар тайёрлаш бўйича ҳамкорлик борасида вилоятда бир қатор ишлар амалга оширилмоқда. Вилоят ҳокими Зоир Мирзаев Жанубий Кореянинг Geonggi-do провинцияси Соғлиқни сақлаш ва тиббиёт бошқармаси бошлиғи Эом Bоун Жа бошчилигидаги делегация аъзолари билан учрашув чоғида бунга ҳам алоҳида тўхталиб ўтди. Аввало, замонавий тиббиётни ривожлантиришда Корея технологияларидан фойдаланиш, унда соғлом овқатланиш, диагностика, касалликни эрта аниқлаш каби барча этапларни ўз ичига олади. Буни вилоятда фаолият юритаётган 600 дан ортиқ хусусий клиникаларда ҳам жорий этиш таклифи илгари сурилди”, — дейилади ҳокимлик маълумотида.
Таъкидланишича, Сирдарё вилоятида тажриба-синов тариқасида жорий этилган тиббиёт суғурта тизими, эндиликда, Тошкент вилоятида ҳам йўлга қўйилмоқда.
.jpg)
“Шу боис вилоят раҳбари аҳолини қийнаётган асосий касалликларни даволашда давлат томонидан кафолатланган бепул, сифатли тиббий хизмат кўрсатиш зарурлиги борасида ҳам маълумот берди. Энг асосийси, вилоят ҳокими Geonggi-do провинциясининг малакали мутахассисларини вилоятга ишга чақирди. Соғлиқни сақлаш бошқармасида раҳбарлик лавозимларида фаолият юритишини, барча шароитлар яратиб берилишини таъкидлади”, — дейди масъуллар.
Қўшимча қилинишича, суҳбат давомида вилоятда оналар ва болалар, айниқса чақалоқларни даволаш билан боғлиқ мутахассисларнинг малакасини ошириш, уйда ётган беморлар парвариши борасида ҳам Кореянинг йўналиши зарурлиги таъкидланган. Хирургия ва онкология соҳалари бўйича кадрлар алмашиш, уларнинг малакасини ошириш юзасидан ҳамкорлик қилишга келишиб олинган.
Изоҳ (0)