Германия мамлакатнинг биринчи миллий хавфсизлик стратегиясини эълон қилди, унда Россия мамлакат хавфсизлиги ва бутун Евро-Атлантика маконига асосий таҳдид деб қаралган. Бу ҳақда Bloomberg хабар берди.
Хавфсизлик стратегиясида Хитой билан ҳамкорликни ривожлантириш ўрин олган. Шунингдек, ҳар йили ишлаб чиқарилган маҳсулотнинг камида 2 фоизини мудофаага сарфлашни расмий сиёсат мақсадига айлантириш кўзда тутилган.
“Бугунги Россия ҳозирда Евро-Атлантика минтақасида тинчлик ва хавфсизликка энг жиддий таҳдиддир”, — дейилади ҳужжатда.
Хитойга нисбатан Германия ҳукумати “сўнгги йилларда рақобат элементлари кучайганини” таъкидлаб, Пекин ҳукумати “кўплаб долзарб глобал муаммоларни унинг иштирокисиз ҳал қилиб бўлмайдиган шерик бўлиб қолаётганини” айтди.
Қайд этилишича, ҳужжат қабул қилинишидан олдин ҳукмрон альянс партиялари ўртасида бир неча ой давом этган тортишув бўлиб, мухолифатдаги қонунчилар ҳукуматни партия сиёсатини мамлакат эҳтиёжларидан устун қўйганликда айблаган.
Олаф Шольц бошчилигидаги Германия социал-демократик партиясининг ташқи сиёсат бўйича вакили Нилс Шмиднинг айтишича, янги хавфсизлик стратегияси Германия ташқи сиёсатининг мақсад ва тамойилларини мустаҳкамлаш учун “муҳим асос” беради.
“Россиянинг босқинчилик уруши ва дунёнинг бошқа қисмларида авторитар тенденциялари ўзимизни янада қатъийроқ кўрсатишимиз кераклигини англатади”, — деди Шмид.
Изоҳ (0)