Халқаро Олимпия қўмитаси (ХОҚ) Ижроқўми Халқаро бокс ассоциациясининг (IBА) мақомини бекор қилишга чақирди.
Ушбу масала бўйича якуний қарор ХОҚнинг 22 июндаги сессиясида эълон қилинади. ХОҚнинг 2 июндаги ҳисоботига кўра, IBА 2021 йилнинг декабрида мақомни тўхтатишни бекор қилиш бўйича қўйилган шартларни бажармаган.
Шу билан бирга ХОҚ Париж—2024 Олимпиадасида бокс бўйича мусобақани сақлаб қолмоқчи. Олимпиададаги бокс жанглари, шунингдек, унга лицензия тақдим этувчи мусобақалар ХОҚ назорати остида ўтади.
2019 йилда ҳам ХОҚ IBA’ни Олимпия ўйинлари бокс мусобақаларини ўтказиш ҳуқуқидан маҳрум қилган ва ўз назорати остида ўтказганди. Ўшанда бунга сабаб сифатида бошқарув, молия, ҳакамлик ва этник муаммолар кўрсатилганди.
2023 йилнинг апрель ойида АҚШ ва Буюк Британия IBА аъзолигидан чиққан ҳамда World Boxing федерациясига асос солганди. Қайд этилишича, ушбу янги ташкилот яқин келажакда IBA’нинг боксдаги ўрнини эгаллашга уринмоқда.
Эслатиб ўтамиз, россиялик Умар Кремлёв 2020 йилнинг декабридан буён IBA’ни бошқариб келмоқда. Бунгача у Россия бокс федерацияси бош котиби лавозимида ишлаган. У лавозимга тайинланган пайтда IBA’нинг қарзлари 20 миллион долларни ташкил қилган. 2021 йилнинг май ойида Кремль барча қарзларнинг тўлиқ қайтарилишини эълон қилган. 2022 йилда Кремлёв IBА президентлигига қайта сайланди.
Изоҳ (0)