Лионель Месси “Барселона”га ўтиш учун “Ал-Ҳилол” ва “Интер Майами”дан ёрдам сўради

Аргентиналик ҳужумчи Лионель Месси “Барселона”га қайтиш учун бор имкониятини ишга соляпти.

Леонинг отаси ва агенти ҳисобланган Хорхе Месси ва футболчининг ўзи ҳам “Ал-Ҳилол” ҳамда “Интер Майами”дан “Барселона”га ўтишга кўмаклашишни сўраган, дея хабар қилмоқда Cadena SER.

Айни вақтда ушбу клублар трансферда иштирок этиш ёки этмаслиги масаласи сўроқ остида қолмоқда. Аввалроқ “Интер Майами” футболчини ўз сафига қўшиб олиб, бир мавсумга “Барселона”га ижарага бериши мумкинлиги ҳақида хабар қилинганди. Қайд этилишича, Мессининг вакиллари араб клубига ҳам шундай таклиф билан чиққан.

“Ал-Ҳилол” Мессига йилига 300 миллион евро маош беришга тайёр, АҚШ клуби эса ҳомийлик шартномаларидан ташқари 50 миллион евро маош таклиф қилган. Шунингдек, Америка клуби Леони акциядорлардан бирига айлантиришга тайёр.

Аввалроқ Месси “Ал-Ҳилол”дан трансферни 2024 йилга қолдириб туришни сўрагани айтилганди.

“Барселона” президенти Хоан Лапорта Хорхе Месси билан бўлган суҳбатда Леога юқори маош тўлашини айтган, Мессининг отаси эса Лионель “Барселона”да текинга ўйнашга ҳам тайёрлигини билдирган. Бироқ Ла Лига Мессини ортиқча воситаларсиз қўлга киритиш йўлида “Барселона”га халал бермоқда.

36 ёшли футболчининг “ПСЖ” билан амалдаги шартномаси 30 июнда ўз якунига етади ва футболчи эркин агентга айланади.