“Реал” XXI асрда фақат уч марта 30 ёшдан катта футболчини олиб келган. Бу ёзда бир йўла 2 нафар шундай ўйинчи келиши мумкин

Карим Бензема “Реал”ни тарк этгач, Мадрид клубининг марказий ҳужум чизиғида янги футболчи пайдо бўлиши деярли аниқ бўлди.

Кўплаб ОАВ “Тоттенҳэм” форварди Ҳарри Кейннинг сотиб олиниши ҳақида хабар тарқатмоқда. Шунингдек, Мадрид жамоаси “Эспаньол” вакили Хоселуга ротациябоб ҳужумчи сифатида қарамоқда.

Шу тариқа “Реал” битта трансфер ойнасида бир йўла икки нафар 30 ва ундан катта ёшли футболчи билан шартнома имзолаши мумкин. Бу Мадрид жамоаси учун ноодатий ҳолат ҳисобланади.

2000 йилдан шу вақтга қадар “Қироллик клуби” фақат уч марта 30 ёшдан катта футболчини жамоага жалб қилган ва уларнинг барчаси турли трансфер ойнасида келган.

2007 йилда “Реал” дарвозабон Ежи Дудек билан шартнома имзолайди. 34 ёшли футболчи ўша вақтда эркин агент мақомида эди.

2010 йилда испан клуби 32 ёшли Рикарду Карвалюни сотиб олади. Трансфер учун “Челси”га 8 миллион евро тўлаб берилади.

2012 йилда эса “Мадрид” Диего Лопесни ўз сафига қўшиб олади. 31 ёшли дарвозабон эркин агент сифатида келган ва кейинроқ Икер Касилясдан асосий посбон мақомини олиб қўйганди.

“Реал” президенти Флорентино Перес камдан кам ҳолларда 30 ёшдан катта бўлган футболчиларга ишонч билдиради. “Реал”да таркибдаги 30+ ёш футболчилар билан ҳатто у юлдуз бўлса ҳам 1 мавсумдан ортиқ муддатга шартнома тузилмаслиги борасида ёзилмаган қоида борлиги ҳам бунинг исботи.

Тўғри, Кейн айни вақтда 29 ёшда, бироқ июль ойида туғилган футболчи “Реал” келгунга қадар 30 лик довонни забт этиши деярли аниқ. 2009 йилда “Реал”да омади чопмаган ва мавсум давомида бор-йўғи иккита ўйинда майдон тушган Хоселу эса айни вақтда 33 ёшда.