Украина Қуролли кучлари руслар томонидан босиб олинган ҳудудларни қайтариб олиш учун режалаштирилган қарши ҳужумни ҳали бошламаган, аммо унинг бошланиши ҳамма учун аён бўлади. Бу ҳақда Миллий хавфсизлик ва мудофаа кенгаши котиби Алексей Данилов маълум қилди.
Шу тариқа Данилов Россия расмийларининг Украина аллақачон қарши ҳужумга ўтгани ҳақидаги сўзларини рад этди. Унинг фикрича, Россия расмийлари Украина Қуролли кучларининг фронтнинг айрим соҳаларида эришган муваффақиятларини каттароқ операция бошланиши сифатида қабул қилган.
“Буларнинг барчаси ҳақиқатга тўғри келмайди. Қарши ҳужум қачон бошланишини армиямиз қарор қилади. Ҳужумни бошлаганимизда буни ҳамма билади ва кўради”, — деди у.
Россия Мудофаа вазирлиги иддаоси
Россия мудофаа вазири Сергей Шойгу Киев узоқ кутилган қарши ҳужумни бошлаганини айтганди. У Украина ҳарбийлари ҳам инсон ресурсларида, ҳам техникада йўқотишларга дуч келганини таъкидлаган.
“4 июнь куни Украина Қуролли кучларининг 23 ва 31-механизациялашган бригадалари қўшинлари бирданига беш йўналишда ҳужум уюштиришга уринди. Улар муваффақиятга эриша олмади. 300 нафар украиналик ҳарбий хизматчи ҳалок бўлди, 16 та танк, 26 та зирҳли техника, 14 та автомобиль йўқ қилинди”, — деган Россия мудофаа вазири.
У 5 июнь куни ҳам ҳужум амалга ошгани, иккала томонда ҳам йўқотишлар борлигини маълум қилган.
Изоҳ (0)