Tesla асосчиси Илон Маск ва Мўғулистон бош вазири Лувсаннамсрайн Оюун-Эрдене сармоялар ва Америка компаниясининг мамлакатдаги фаолиятини кенгайтириш масалаларини муҳокама қилди.
Суҳбат видеоалоқа орқали бўлиб ўтди, бу ҳақда Мўғулистон ҳукумати матбуот хизмати хабар қилди.
Маълум қилинишича, Маск ва Оюун-Эрдене Мўғулистонда электромобиллар учун аккумуляторлар ишлаб чиқарадиган завод қуриш имкониятларини муҳокама қилган.
Шунингдек, бундай аккумуляторларда қўлланадиган ва Мўғулистонда фаол қазиб олинаётган мис ва нодир ер элементларидан кенгроқ фойдаланишни биргаликда ўрганиш имкониятлари кўриб чиқилди. Бундан ташқари, улар Мўғулистон IT-мутахассислари учун ўқув дастурини ишга тушириш масаласини муҳокама қилдилар.
Оюун-Эрдене электр транспорт воситалари ва бошқа яшил технологияларнинг тарқалишини қўллаб-қувватлашини ва ўз юртдошларини электр транспорт воситаларидан фойдаланишга ундашини айтди. Америка оммавий ахборот воситаларининг ёзишича, суҳбатдошлар Маскнинг яна бир лойиҳаси бўлган Starlink сунъий йўлдош интернетини Мўғулистонда жойлаштириш масаласини ҳам муҳокама қилган.