Украина президенти Владимир Зеленский Каховка ГЭСи тўғонининг вайрон бўлиши натижасида мамлакат ҳудудларини сув босганини Европадаги сўнгги ўн йилликлардаги энг йирик техноген экологик офат деб атади. Бу ҳақда у Бухарест тўққизлиги саммити иштирокчиларига мурожаатида маълум қилди.

Зеленский тўғон портлаши учун жавобгарликни бир йилдан ортиқ вақтдан бери Каховка ГЭСни назорат қилиб келаётган Россия зиммасига юклади. Украина президенти россиялик расмийларнинг станция ўққа тутилиши натижасида вайрон бўлганини даъво қилган айбловларини рад этди.

Унинг сўзларига кўра, ГЭС Россия томонидан миналанган ва ГЭСни ўқ узиш орқали вайрон қилиш “жисмоний жиҳатдан ҳақиқатга тўғри келмайди”.

“Россия оммавий экологик ҳалокат бомбасини портлатди. Бу ҳақиқий экоцид! Бу Европадаги сўнгги ўн йилликлардаги энг йирик техноген экологик офатдир. Шунинг учун Россиянинг мағлубияти ҳудудларимиз, Европа ва бутун дунё хавфсизлигига энг катта ҳисса бўлади”, — деди у.

Зеленский саммит иштирокчиларига Россияга қарши курашда кўрсатган ёрдами учун миннатдорлик билдирди.

“Ниҳоят, Украина НАТОга аъзо бўлишини аниқлаш керак ва буни фақат Украинага таклиф билан аниқлаш мумкин. Киевга альянс йўлида хавфсизлик кафолатларини бериш арзийди”, — деди сиёсатчи.

Каховка ГЭСи портлатилиши

6 июнь куни Херсон вилоятининг Россия томонидан вақтинча босиб олинган қисмида Каховка ГЭСнинг тўғони портлатилди. Сув Днепрнинг қуйи оқимига назоратсиз равишда оқизилган. Украина ва Россия бир-бирини ГЭСни вайрон қилишда айблади. Сув тошқинлари хавфи остида қолган ҳудудлардан аҳоли эвакуация қилинмоқда.

Владимир Зеленскийнинг сўзларига кўра, станциянинг вайрон бўлиши оқибатида 80 га яқин шаҳар ва қишлоқлар “сув остида” қолган, уларда Россиянинг кенг кўламли босқинидан олдин камида 100 минг киши яшаган. Қрим ва Запорожье атом электр станциясига сув танқислиги таҳдид солаётгани айтилмоқда.