Ukraina prezidenti Vladimir Zelenskiy Kaxovka GESi to‘g‘onining vayron bo‘lishi natijasida mamlakat hududlarini suv bosganini Yevropadagi so‘nggi o‘n yilliklardagi eng yirik texnogen ekologik ofat deb atadi. Bu haqda u Buxarest to‘qqizligi sammiti ishtirokchilariga murojaatida ma’lum qildi.

Zelenskiy to‘g‘on portlashi uchun javobgarlikni bir yildan ortiq vaqtdan beri Kaxovka GESni nazorat qilib kelayotgan Rossiya zimmasiga yukladi. Ukraina prezidenti rossiyalik rasmiylarning stansiya o‘qqa tutilishi natijasida vayron bo‘lganini da’vo qilgan ayblovlarini rad etdi.

Uning so‘zlariga ko‘ra, GES Rossiya tomonidan minalangan va GESni o‘q uzish orqali vayron qilish “jismoniy jihatdan haqiqatga to‘g‘ri kelmaydi”.

“Rossiya ommaviy ekologik halokat bombasini portlatdi. Bu haqiqiy ekotsid! Bu Yevropadagi so‘nggi o‘n yilliklardagi eng yirik texnogen ekologik ofatdir. Shuning uchun Rossiyaning mag‘lubiyati hududlarimiz, Yevropa va butun dunyo xavfsizligiga eng katta hissa bo‘ladi”, — dedi u.

Zelenskiy sammit ishtirokchilariga Rossiyaga qarshi kurashda ko‘rsatgan yordami uchun minnatdorlik bildirdi.

“Nihoyat, Ukraina NATOga a’zo bo‘lishini aniqlash kerak va buni faqat Ukrainaga taklif bilan aniqlash mumkin. Kiyevga alyans yo‘lida xavfsizlik kafolatlarini berish arziydi”, — dedi siyosatchi.

Kaxovka GESi portlatilishi

6-iyun kuni Xerson viloyatining Rossiya tomonidan vaqtincha bosib olingan qismida Kaxovka GESning to‘g‘oni portlatildi. Suv Dneprning quyi oqimiga nazoratsiz ravishda oqizilgan. Ukraina va Rossiya bir-birini GESni vayron qilishda aybladi. Suv toshqinlari xavfi ostida qolgan hududlardan aholi evakuatsiya qilinmoqda.

Vladimir Zelenskiyning so‘zlariga ko‘ra, stansiyaning vayron bo‘lishi oqibatida 80 ga yaqin shahar va qishloqlar “suv ostida” qolgan, ularda Rossiyaning keng ko‘lamli bosqinidan oldin kamida 100 ming kishi yashagan. Qrim va Zaporojye atom elektr stansiyasiga suv tanqisligi tahdid solayotgani aytilmoqda.