Австралиянинг The Sydney Morning Herald газетасига кўра, Австралия янги ҳарбий ёрдам пакети доирасида Украинага Hawkei зирҳли машиналарини етказиб бермоқчи. Етказиб бериш қачон амалга оширилиши ҳозирча номаълум.

Нашрнинг ёзишича, Австралиянинг Украинага янги ҳарбий ёрдам пакетини ажратиш тўғрисидаги қарор аллақачон келишилган, бироқ  ҳужжатлар ҳали тасдиқланмаган ва имзоланмаган.

“Келишувга эришилди, аммо келишув Канберранинг расмий тизимлари орқали ҳали кўриб чиқилмаган”, — дейди манбалар.

Таъкидланишича, зирҳли машиналарни Австралиядан Украина томони сўраган, уларни етказиб бериш аллақачон мудофаа вазири Ричард Марлз даражасида келишилган.

Жаноб Марлзнинг ўзи Киевга қурол-яроғ етказиб берилиши ҳақида изоҳ беришдан бош тортди.

Унинг сўзларига кўра, украиналиклар ўзларига керак бўлган қуролларнинг “рўйхатини тақдим этишган”, шунингдек, яқинда Сингапурда бўлиб ўтган хавфсизлик саммити чоғида Украина мудофаа вазири Алексей Резников билан батафсил суҳбатлашганини айтди.

Ричард Марлзнинг сўзларига кўра, суҳбат чоғида Украинага Австралиядан кўрсатиладиган янги ёрдам пакети муҳокама қилинган.