Литва Ядро энергетикаси хавфсизлиги бўйича давлат инспекцияси Беларусь Фавқулодда вазиятлар вазирлигига Островец шаҳридаги Беларусь атом электр станциясининг 1 ва 2-энергоблоклари ишини тўхтатиш талаби билан хат юборганини маълум қилди.

Хатда барча ядровий хавфсизлик масалалари ҳал этилмагунча электростанцияни ишлатмаслик сўралган.

“Ядро хавфсизлигини таъминлаш бўйича кўплаб масалалар ҳалигача ҳал этилмаган. Литва Ядро энергетикаси хавфсизлиги бўйича давлат инспекцияси ҳалигача улардан АЭС учун танланган жой билан боғлиқ хавфсизлик саволларига жавоб кутаётганини эслатди. Шунингдек, Беларусь АЭСнинг сейсмик ҳодисаларга чидамлилиги, эҳтимолий авиаҳалокат оқибатлари қандай бўлиши, стресс-тестлар бўйича тавсияларга риоя қилиш, хавфсизлик, ёнғин хавфини баҳолаш ва бошқа масалалар бўйича саволлар очиқ турибди”, — дейилади инспекция баёнотида.

Таъкидланишича, Литва идораси Беларусь ҳукуматидан станциянинг 2-энергоблок реакторининг совитиш схемаси органик моддалар билан, 1-энергоблокнинг иккиламчи айланиш схемаси эса радионуклидлар билан ифлослангани ҳақидаги маълумотга аниқлик киритишни сўрамоқда. Инспекция, шунингдек, реактор корпусидаги камчиликлар, аниқланган нуқсонлар ва тугалланмаган ишлар бўйича тушунтиришлар талаб қилмоқда.

Хат нусхалари Халқаро атом энергияси агентлиги (МАGATE), Европа комиссияси, Европа ядровий хавфсизликни тартибга солиш гуруҳи (ENSREG) ва Ғарбий Европа ядровий тартибга солувчилар уюшмасига (WENRA) юборилган.

Беларусда электр энергиясини босқичма-босқич ишга тушириш дастурига мувофиқ 13 май куни Беларусь АЭСнинг иккинчи энергетика блоки (Островецда) илк бор электр тармоғига уланди — у мамлакатнинг ягона энергетика тизимига биринчи киловатт-соат электр энергиясини етказиб берди.