Rossiya Mudofaa vazirligi Moskvaga 30-may kuni ertalab uyushtirilgan dronlar hujumida Ukrainani aybladi.

“Ertalab Kiyev rejimi Moskvadagi obyektlarga uchuvchisiz uchar apparatlar yordamida terakt uyushtirdi”, — deyiladi vazirlik xabarida.

Mudofaa vazirligi maʼlumotlariga ko‘ra, shaharga sakkizta samolyot tipidagi dron hujum qilgan. Vazirlikning ta’kidlashicha, Moskva viloyatida “Pantsir-S” zenit-raketa tizimi tomonidan beshta dron urib tushirilgan, yana uchtasiga radioelektron kurashish vositalari bilan ta’sir o‘tkazilgan, natijada ular “nazoratni yo‘qotib, mo‘ljallangan nishonlardan og‘ishgan”.

Shot Telegram-kanali o‘z manbasiga tayanib, Moskvaga 32 ta dron hujum qilganini yozdi: ulardan 19 tasi Moskva viloyatida urib tushirilgan, o‘nga yaqini shaharda qulab, daraxtlarga ilinib qolgan, yana uchtasi turar joy binolariga teggan. Baza Telegram kanali Moskvaga 25 ga yaqin dron hujum qilganini yozdi.

Ukraina prezident ofisi rahbarining maslahatchisi Mixail Podolyak Breakfast show dasturi efirida Moskvaga qilingan dronlar hujumiga munosabat bildirdi.

“Bir narsani tushunish kerak. Bilasiz, sun’iy intellekt davriga o‘tmoqdamiz. Balki dronlarning hammasi ham Ukrainaga hujum qilishga tayyor emasdir, balki ular o‘z egalariga qaytib, ulardan ba’zi savollarga javob xohlayotgandir: ‘Nega bizni Ukrainadagi bolalarni urish uchun yuboryapsiz? Kiyevdagi bolalarni?’ va hokazo”.

Jurnalistning Ukraina hujumga aloqadormi, degan to‘g‘ridan to‘g‘ri savoliga Podolyak “biz mamnuniyat bilan kuzatyapmiz va hujumlar soni oshishini taxmin qilyapmiz”, deb javob berdi. Ammo, “albatta, bunga bizning bevosita aloqamiz yo‘q” deb ta’kidladi.