Украина Қуролли кучлари Ҳарбий-ҳаво кучлари қўмондонлигининг маълум қилишича, Россия қўшинлари 26 январга ўтар кечаси Украинага 24 та “Shahed-136/131” камикадзе-дронлари билан ҳужум қилди. Дронларнинг барчаси уриб туширилди.
“Дронлар зенит-ракета бўлинмалари, қирувчи авиация, ҳаво кучларининг мобил ўт очиш гуруҳлари томонидан Украина мудофаа кучларининг бошқа таркибий қисмлари ҳаво ҳужумидан мудофаа бўлинмалари билан ҳамкорликда йўқ қилинди”, — дейилади хабарда.
Украина Қуролли кучлари маълумотларига кўра, ҳужумчи дронлар Азов денгизининг шарқий қирғоғидан учиб келган.
25 январь куни кечқурун Украинанинг кўплаб ҳудудларида ҳаво тревогаси янгради. UNIAN маълумотларига кўра, учувчисиз учоқларнинг асосий қисми Запороже ва Днепрбўйи вилоятлари устида уриб туширилган. Кейинчалик Киев вилоятида ҳаво ҳужумидан мудофаа тизимлари ишга тушгани ҳақида хабар берилди. 26 январга ўтар кечаси Днепрбўйи вилоят кенгаши раҳбари Николай Лукашук минтақадаги саноат корхонасига зарба берилганини маълум қилди. Унинг сўзларига кўра, зарбадан ҳеч ким жабрланмаган.
Октябрь ойи бошидан бери Россия Эрондан сотиб оладиган ракета ва дронлар ёрдамида Украина ҳудудига мунтазам равишда оммавий зарбалар бермоқда. Ноябрь ойида Украина бош вазири Денис Шмигал Россиянинг Украина энергетика тизимига зарбалари оқибатида етказилган умумий зарар 70 миллиард гривнадан (тахминан 1,9 миллиард доллар) ошганини айтганди.
Изоҳ (0)